អង្គការសហប្រជាជាតិ (UN) និងក្រុមផ្តល់ជំនួយ កាលពីថ្ងៃពុធ (ទី១៧ ខែធ្នូ) បានព្រមានថា ប្រតិបត្តិការមនុស្សធម៌ នៅក្នុងដែនដីប៉ាឡេស្ទីន ជាពិសេសតំបន់ហ្កាហ្សា ប្រឈមនឹងការដួលរលំ ប្រសិនបើអ៊ីស្រាអែលមិនដកចេញនូវឧបសគ្គនានា ដែលរួមមានដំណើរការចុះឈ្មោះ «មិនច្បាស់លាស់ តាមតែអំណាចបង្គាប់ស្រេចនឹងចិត្ត ហើយនិងមានឥទ្ធិពលនយោបាយខ្លាំងពេក»។

នៅក្នុងសេចក្តីថ្លែងការណ៍រួម UN និងក្រុមជំនួយ ទាំងក្នុងស្រុក និងអន្តរជាតិជាង ២០០ស្ថាប័ន បានលើកឡើងថា ក្រុមជំនួយអន្តរជាតិរាប់សិប ប្រឈមនឹងការលុបឈ្មោះចេញពីបញ្ជីអនុញ្ញាត ត្រឹមថ្ងៃទី៣១ ខែធ្នូ ដែលមានន័យថា ទីភ្នាក់ងារទាំងនោះនឹងត្រូវបិទប្រតិបត្តិការក្នុងរង្វង់ ៦០ថ្ងៃ។

សេចក្តីថ្លែងការណ៍នោះបានឲ្យដឹងថា៖ «ការលុបឈ្មោះអង្គការ INGO (អង្គការមិនមែនរដ្ឋាភិបាលអន្តរជាតិ) នៅតំបន់ហ្កាហ្សា នឹងផ្ដល់ផលប៉ះពាល់ដ៏មហន្តរាយដល់លទ្ធភាពទទួលបានសេវាសំខាន់ៗ និងជាមូលដ្ឋាន»។

សេចក្ដីថ្លែងការណ៍ បានបន្ថែមថា៖ «INGO ដំណើរការ ឬគាំទ្រដល់មន្ទីរពេទ្យបណ្ដោះអាសន្ន មជ្ឈមណ្ឌលថែទាំសុខភាពបឋម ការឆ្លើយតបផ្ដល់ជម្រកសង្គ្រោះបន្ទាន់ សេវាទឹក និងអនាម័យ មជ្ឈមណ្ឌលរក្សាលំនឹងអាហារូបត្ថម្ភ សម្រាប់កុមារដែលខ្វះខាតអាហារូបត្ថម្ភស្រួចស្រាល់ និងការងារកម្ចាត់មីនសំខាន់ៗ»។

បេសកកម្មរបស់អ៊ីស្រាអែល ប្រចាំនៅ UN នៅទីក្រុង New York សហរដ្ឋអាមេរិក មិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងសេចក្តីថ្លែងការណ៍នេះ។

គួរបញ្ជាក់ថា នៅក្រោមដំណាក់កាលទី១ នៃផែនការហ្កាហ្សារបស់ប្រធានាធិបតីអាមេរិក លោក Donald Trump បទឈប់បាញ់ដ៏ផុយស្រួយ នៅក្នុងសង្រ្គាមរយៈពេល ២ឆ្នាំ រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន បានចាប់ផ្តើមនៅថ្ងៃទី១០ ខែតុលា។ ក្រុមហាម៉ាសបានដោះលែងចំណាប់ថ្នូរ អ៊ីស្រាអែលបានដោះលែងអ្នកទោសប៉ាឡេស្ទីន ហើយជំនួយជាច្រើនទៀតបានចាប់ផ្តើមហូរចូលទៅក្នុងដែនដីនេះ ដែលក្រុមអ្នកឃ្លាំមើលភាពអត់ឃ្លានសកល បានលើកឡើងកាលពីខែសីហាថា ទុរ្ភិក្សបានមានកម្រិតធ្ងន់ធ្ងរទៅៗ៕