នាយករដ្ឋមន្ត្រីអូស្ត្រាលី លោក Anthony Albanese បានប្រកាសនៅថ្ងៃសុក្រ (១៩ ធ្នូ) នេះថា ប្រទេសអូស្ត្រាលី នឹងចាប់ផ្តើមគម្រោងថ្នាក់ជាតិមួយក្នុងការប្រមូលទិញកាំភ្លើងមកវិញ បន្ទាប់ពីការបាញ់ប្រហារសម្លាប់រង្គាលនៅឆ្នេរ Bondi ដ៏ល្បីល្បាញក្នុងទីក្រុងស៊ីដនី។

ការទិញយកមកវិញនេះ នឹងស្រដៀងគ្នាទៅនឹងកំណែទម្រង់អាវុធ ដែលត្រូវបានដាក់ចេញភ្លាមៗបន្ទាប់ពីការសម្លាប់រង្គាលក្នុងឆ្នាំ១៩៩៦ នៅទីក្រុង Port Arthur រដ្ឋ Tasmania បន្ទាប់ពីខ្មាន់កាំភ្លើងម្នាក់ បានបាញ់សម្លាប់មនុស្ស ៣៥នាក់ ដោយបានជំរុញឱ្យអាជ្ញាធរអូស្រ្តាលីអនុវត្តច្បាប់អាវុធ ដែលស្ថិតក្នុងចំណោមច្បាប់តឹងរ៉ឹងបំផុតមួយចំនួនក្នុងពិភពលោក។

គួររម្លឹកថា មនុស្ស ១៥ នាក់ត្រូវបានសម្លាប់ និងរាប់សិបនាក់រងរបួសកាលពីថ្ងៃអាទិត្យកន្លងទៅ នៅឆ្នេរ Bondi បន្ទាប់ពីខ្មាន់កាំភ្លើងពីរនាក់ជាឪពុកនិងកូនប្រុស បានបើកការបាញ់ប្រហារទៅលើហ្វូងមនុស្ស ដែលកំពុងប្រារព្ធពិធីបុណ្យជនជាតិជ្វីហ្វ Hanukkah ។ ខ្មាន់កាភ្លើងជាឪពុក បានស្លាប់ក្នុងហេតុការណ៍នោះ ដែលនាំឱ្យចំនួនអ្នកស្លាប់សរុបមាន ១៦នាក់ ចំណែកខ្មាន់កាំភ្លើងជាកូនប្រុស រងរបួសធ្ងន់ និងត្រូវបានចោទប្រកាន់ផ្លូវច្បាប់រាប់សិបករណី។

អំឡុងពេលសន្និសីទសារព័ត៌មាន លោក Albanese បាននិយាយថា បច្ចុប្បន្ននេះមានអាវុធប្រមាណ ៤លានដើម កំពុងនៅក្នុងអូស្រ្តាលី ហើយរដ្ឋាភិបាលនឹងកំណត់គោលដៅលើអាវុធលើសចំនួន អាវុធដែលទើបត្រូវបានហាមឃាត់ថ្មីៗ និងអាវុធខុសច្បាប់ ដោយការចំណាយនឹងត្រូវចែករំលែករវាងរដ្ឋាភិបាលសហព័ន្ធ និងរដ្ឋរបស់ប្រទេសនេះ៕