អ្នកនាំពាក្យអង្គការសហប្រជាជាតិម្នាក់ បាននិយាយកាលពីថ្ងៃព្រហស្បតិ៍ថា ក្រុមឧទ្ទាមហ៊ួទីនៅប្រទេសយេម៉ែន បានចាប់ឃុំខ្លួនបុគ្គលិកអង្គការសហប្រជាជាតិចំនួន ១០នាក់ ផ្សេងទៀត នៅទីក្រុងសាណា ដែលធ្វើឲ្យចំនួនបុគ្គលិកUNសរុប ដែលក្រុមនេះបានឃុំខ្លួន កើនឡើងដល់ ៦៩ នាក់។

នៅក្នុងសេចក្តីថ្លែងការណ៍ដែលបានឃើញដោយសារព័ត៌មានស៊ីនហួ លោក Farhan Haq អ្នកនាំពាក្យរងរបស់អគ្គលេខាធិការUN បានបញ្ជាក់៖«ការឃុំខ្លួនដោយបំពាននូវសមាជិក ១០នាក់ របស់អង្គការសហប្រជាជាតិដោយអាជ្ញាធរហ៊ួទី នៅក្នុងទីក្រុង Sanaa ដោយបន្ថែមថា ចំនួនបុគ្គលិក UN ដែលត្រូវបានឃុំខ្លួនសរុប បានកើនឡើងដល់ ៦៩នាក់។

នាពេលមុននេះ បុគ្គលិកUNម្នាក់ដែនជាជនជាតិយេម៉ែន នៅទីក្រុង Sanaa ដែលនិយាយក្នុងលក្ខខណ្ឌមិនបញ្ចេញឈ្មោះ បានប្រាប់កាសែតស៊ីនហួថា កងកម្លាំងហ៊ួទី បានចាប់ខ្លួនបុគ្គលិកយេម៉ែនចំនួន ៤នាក់ដែលធ្វើការឲ្យនាយករដ្ឋានសុវត្ថិភាព និងសន្តិសុខអង្គការសហប្រជាជាតិ កម្មវិធីអភិវឌ្ឍន៍អង្គការសហប្រជាជាតិ និងមូលនិធិកុមារអង្គការសហប្រជាជាតិ។ ប្រភពព័ត៌មានបាននិយាយថា បុគ្គលិកសន្តិសុខហ៊ួទី ធីបានឆ្មក់ឆែកផ្ទះរបស់ពួកគេ មុនពេលចាប់ពួកគេឃុំខ្លួន។

ក្រុមហ៊ួទីមិនបានធ្វើអត្ថាធិប្បាយភ្លាមៗទេ។

ការចាប់ខ្លួននេះ បានកើតឡើង មួយថ្ងៃបន្ទាប់ពីអគ្គលេខាធិការ UN លោក អង់តូនីញ៉ូ ហ្គុយតឺរេស (Antonio Guterres) បានថ្កោលទោសការបន្តឃុំខ្លួនបុគ្គលិក UN នៅក្នុងប្រទេសយេម៉ែន។ ថ្លែងទៅកាន់អ្នកសារព័ត៌មានកាលពីថ្ងៃពុធ បន្ទាប់ពីកិច្ចប្រជុំបិទទ្វាររបស់ក្រុមប្រឹក្សាសន្តិសុខUN លោក ហ្គុយតឺ    រេស បាននិយាយថា៖«ខ្ញុំថ្កោលទោសយ៉ាងដាច់អហង្ការចំពោះការបន្តឃុំខ្លួនដោយបំពាននូវសហការី និងដៃគូអង្គការសហប្រជាជាតិចំនួន ៥៩ នាក់ ក៏ដូចជាបុគ្គលមកពីអង្គការមិនមែនរដ្ឋាភិបាល អង្គការសង្គមស៊ីវិល និងបេសកកម្មការទូត។ ខ្ញុំសូមអំពាវនាវឲ្យមានការដោះលែងពួកគេជាបន្ទាន់ និងដោយគ្មានលក្ខខណ្ឌ ស្របតាមច្បាប់អន្តរជាតិ»៕