អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) បាននិយាយកាលពីថ្ងៃព្រហស្បតិ៍ថា ចាប់តាំងពីឆ្នាំ ២០១៤ មក ជនអន្តោប្រវេសន៍ជិត ៧០.000នាក់ បានស្លាប់ ឬបាត់ខ្លួនតាមផ្លូវគោក និងផ្លូវទឹក ដោយចំនួនពិតប្រាកដទំនងជាខ្ពស់ជាងនេះទៅទៀត។ 

នៅក្នុងសាររបស់លោកនៅទិវាជនអន្តោប្រវេសន៍អន្តរជាតិ ដែលត្រូវបានប្រារព្ធជារៀងរាល់ឆ្នាំ នៅថ្ងៃទី ១៨ ខែធ្នូ លោក ហ្គុយតឺរេស បានថ្លែងថា ការធ្វើទេសន្តរប្រវេសន៍ គឺជាកម្លាំងចលករដ៏មានឥទ្ធិពលនៃវឌ្ឍនភាព ការលើកកម្ពស់សេដ្ឋកិច្ច ការតភ្ជាប់វប្បធម៌ និងការផ្តល់អត្ថប្រយោជន៍ដល់ប្រទេសដើម និងប្រទេសគោលដៅ។

លោកបាននិយាយថា៖«ប៉ុន្តែនៅពេលដែលការធ្វើទេសន្តរប្រវេសន៍ ត្រូវបានគ្រប់គ្រងមិនបានល្អ ឬត្រូវបានបំភ្លៃ វាអាចជំរុញការស្អប់ខ្ពើម និងការបែកបាក់ ដែលធ្វើឲ្យគ្រោះថ្នាក់ដល់ជីវិតមនុស្សដែលស្វែងរកសុវត្ថិភាព និង    ឱកាស ដោយបន្ថែមថា ដោយសារព្រំដែនកាន់តែតឹងរ៉ឹង និងអ្នករត់ពន្ធ និងជនជួញដូរកាន់តែរីកចម្រើន «ស្ត្រី និងកុមារ គឺស្ថិតក្នុងចំណោមអ្នកដែលប្រឈមនឹងហានិភ័យបំផុត»។

ដោយចង្អុលទៅកិច្ចព្រមព្រៀងសកលសម្រាប់ការធ្វើទេសន្តរប្រវេសន៍ដោយសុវត្ថិភាព មានសណ្តាប់ធ្នាប់ និងទៀងទាត់ ដែលបានអនុម័តកាលពី ៧ ឆ្នាំមុន លោកបាននិយាយថា សហគមន៍អន្តរជាតិ «អាចនិងត្រូវតែទាញយកឥទ្ធិពលនៃការធ្វើទេសន្តរប្រវេសន៍ ដើម្បីជំរុញការអភិវឌ្ឍប្រកបដោយចីរភាព និងកសាងសង្គមដែលធន់ជាងមុន»៕