ប្រធានទីភ្នាក់ងារជនភៀសខ្លួនរបស់អង្គការសហប្រជាជាតិប្រចាំប្រទេសលីបង់ បាននិយាយកាលពីថ្ងៃព្រហស្បតិ៍ថា ការសម្រេចចិត្តរបស់សហរដ្ឋអាមេរិកក្នុងការលើកលែងទណ្ឌកម្មយ៉ាងទូលំទូលាយលើប្រទេសស៊ីរីអាចលើកទឹកចិត្តជនភៀសខ្លួនកាន់តែច្រើនឲ្យវិលត្រឡប់ទៅប្រទេសរបស់ពួកគេវិញ។

ព្រឹទ្ធសភាសហរដ្ឋអាមេរិកបានបោះឆ្នោតកាលពីថ្ងៃពុធ ដើម្បីដកទណ្ឌកម្មជាអចិន្ត្រៃយ៍ បន្ទាប់ពីរដ្ឋបាលរបស់លោកប្រធានាធិបតី ដូណាល់ ត្រាំ ពីមុន បានលើកលែងទណ្ឌកម្មជាបណ្តោះអាសន្នដោយបទ   ក្រឹត្យ។ ការបោះឆ្នោតនេះ បានកើតឡើងជាផ្នែកមួយនៃការអនុម័តច្បាប់ចំណាយការពារជាតិប្រចាំឆ្នាំរបស់ប្រទេសនេះ។ លោក ត្រាំ ត្រូវបានគេរំពឹងថា នឹងចុះហត្ថលេខាលើការដកទណ្ឌកម្មចុងក្រោយ នៅថ្ងៃព្រហស្បតិ៍។

លោកស្រី Karolina Lindholm Billing តំណាង UNHCR ប្រចាំលីបង់ បាននិយាយថា ជនភៀសខ្លួនស៊ីរីប្រមាណ ៤០០,០០០ នាក់ បានវិលត្រឡប់មកពីប្រទេសលីបង់ ចាប់តាំងពីការបណ្តេញអតីតប្រធានាធិបតីស៊ីរី លោក បាសា អាល់អាសាដ ចេញពីតំណែង ក្នុងខែធ្នូ ឆ្នាំ ២០២៤ បន្ទាប់ពីសង្គ្រាមស៊ីវិលជិត ១៤ ឆ្នាំ ដោយមានប្រហែល ១ លាននាក់នៅសល់ក្នុងប្រទេសនេះ។ ក្នុងចំណោមនោះ ប្រហែល ៦៣៦.០០០ នាក់ ត្រូវបានចុះឈ្មោះជាផ្លូវការជាមួយទីភ្នាក់ងារជនភៀសខ្លួននេះ។

ទីភ្នាក់ងារជនភៀសខ្លួនរបស់អង្គការសហប្រជាជាតិ បានរាយការណ៍ថា សរុបមក ជនភៀសខ្លួនជាង ១ លាននាក់ និងជនជាតិស៊ីរីដែលផ្លាស់ទីលំនៅក្នុងស្រុកជិត ២ លាននាក់ បានវិលត្រឡប់ទៅផ្ទះសម្បែងរបស់ពួកគេវិញ ចាប់តាំងពីរបបលោក អាសាដ ត្រូវបានផ្តួលរំលំ៕