រដ្ឋមន្ត្រីការបរទេសអាមេរិក លោក Marco Rubio កាលពីថ្ងៃព្រហស្បតិ៍ (ទី១៨ ខែធ្នូ) បាននិយាយថា សហរដ្ឋអាមេរិកកំពុងដាក់ទណ្ឌកម្មលើចៅក្រម ២រូបរបស់តុលាការព្រហ្មទណ្ឌអន្តរជាតិ (ICC) ពាក់ព័ន្ធនឹងការកំណត់គោលដៅលើប្រទេសអ៊ីស្រាអែល ដោយធ្វើឲ្យចំនួនមន្ត្រីតុលាការជាន់ខ្ពស់ដែលស្ថិតក្រោមទណ្ឌកម្មរបស់សហរដ្ឋអាមេរិកកើនដល់ ១១នាក់ហើយ។

នៅក្នុងសេចក្តីថ្លែងការណ៍មួយ ដោយបាននិយាយយោងទៅក្រឹត្យដាក់ទណ្ឌកម្ម ICC ដែលលោកប្រធានាធិបតី Donald Trump បានចុះហត្ថលេខាកាលពីខែកុម្ភៈ លោក Rubio បានបញ្ជាក់ថា៖ «ថ្ងៃនេះ ខ្ញុំកំពុងកំណត់ចៅក្រមតុលាការព្រហ្មទណ្ឌអន្តរជាតិ (ICC) ២រូប គឺលោក Gocha Lordkipanidze របស់ប្រទេសហ្សកហ្ស៊ី និងលោក Erdenebalsuren Damdin របស់ប្រទេសម៉ុងហ្គោលី ដោយអនុលោមតាមក្រឹត្យលេខ១៤២០៣ (Executive Order 14203)»។

លោកបានបន្ថែមថា៖ «បុគ្គលទាំងនេះបានចូលរួមដោយផ្ទាល់ នៅក្នុងកិច្ចប្រឹងប្រែងរបស់ ICC ដើម្បីស៊ើបអង្កេត ចាប់ខ្លួន ឃាត់ខ្លួន ឬកាត់ទោសជនជាតិអ៊ីស្រាអែល ដោយគ្មានការយល់ព្រមពីអ៊ីស្រាអែល»។

នៅក្នុងសេចក្តីថ្លែងការណ៍របស់លោក Rubio សំដៅទៅលើការពាក់ព័ន្ធរបស់ចៅក្រម នៅក្នុងការបោះឆ្នោត ដើម្បីបដិសេធការប្រឈមមួយ ក្នុងចំណោមបញ្ហាប្រឈមផ្លូវច្បាប់ជាច្រើនរបស់អ៊ីស្រាអែល ប្រឆាំងនឹងការស៊ើបអង្កេតរបស់ ICC ចំពោះការប្រព្រឹត្តរបស់ប្រទេសនេះ ក្នុងសង្រ្គាមនៅតំបន់ហ្កាហ្សា កាលពីដើមសប្តាហ៍នេះ។ 

ចៅក្រមដែលមានឈ្មោះ គឺជាផ្នែកមួយនៃក្រុមដែលបដិសេធមិនលុបចោលការសម្រេចរបស់តុលាការថ្នាក់ក្រោម ដែលថា ការស៊ើបអង្កេតរបស់រដ្ឋអាជ្ញាលើបទចោទឧក្រិដ្ឋកម្ម ដែលត្រូវបានចោទប្រកាន់នៅក្រោមយុត្តាធិការរបស់ខ្លួន អាចរួមបញ្ចូលព្រឹត្តិការណ៍ជាច្រើន បន្ទាប់ពីមានការវាយប្រហារលើអ៊ីស្រាអែល ដោយក្រុមសកម្មប្រយុទ្ធហាម៉ាសប៉ាឡេស្ទីន កាលពីថ្ងៃទី៧ ខែតុលា ឆ្នាំ២០២៣។ ICC បានឲ្យដឹងថា ខ្លួនបានបដិសេធយ៉ាងម៉ឺងម៉ាត់ ចំពោះការដាក់ទណ្ឌកម្មជុំថ្មី ដែលជាវិធានការជុំទី៤ នៅឆ្នាំនេះ៕