បេសកជនចិនម្នាក់កាលពីថ្ងៃសុក្រ បានអំពាវនាវដល់សហគមន៍អន្តរជាតិឲ្យគាំទ្រដល់តួអង្គនយោបាយរបស់ប្រទេសលីប៊ី ក្នុងការដោះស្រាយភាពខ្វែងគំនិតរបស់ពួកគេឲ្យបានឆាប់រហ័ស និងកសាងការឯកភាពគ្នា ដើម្បីបង្រួបបង្រួមនយោបាយឲ្យបានពេញលេញ។

លោក Sun Lei តំណាងអចិន្ត្រៃយ៍រងរបស់ប្រទេសចិនប្រចាំអង្គការសហប្រជាជាតិ បានប្រាប់ក្រុមប្រឹក្សាសន្តិសុខថា៖«វាពិតជាមានសារៈសំខាន់ណាស់ក្នុងការអំពាវនាវដល់ភាគីពាក់ព័ន្ធទាំងនៅភាគខាងលិច និងខាងកើតនៃប្រទេសលីប៊ី ឲ្យបង្ហាញពីឆន្ទៈនយោបាយ និងបញ្ចប់បញ្ហាដែលនៅសេសសល់ឲ្យបានឆាប់រហ័ស ដើម្បីបើកផ្លូវសម្រាប់ការរៀបចំការបោះឆ្នោតជាតិ»។

លោក Sun បានកត់សម្គាល់ថា នាពេលថ្មីៗនេះ បេសកកម្មគាំទ្ររបស់អង្គការសហប្រជាជាតិនៅលីប៊ីសម្រេចបានវឌ្ឍនភាពក្នុងការសម្របសម្រួលដំណើរការនយោបាយ នៅក្នុងប្រទេសនេះ។ ក្នុងពេលជាមួយគ្នានេះ វិបត្តិនយោបាយដ៏ធ្ងន់ធ្ងរនៅក្នុងប្រទេសលីប៊ី នៅតែមិនទាន់ដោះស្រាយបាន ហើយភាពមិនចុះសម្រុងគ្នានៃស្ថាប័នរដ្ឋ កំពុងរារាំងការគ្រប់គ្រងជាតិ។

លោកបាននិយាយថា ភាគីពាក់ព័ន្ធត្រូវតែអនុវត្តយ៉ាងតឹងរ៉ឹងនូវសេចក្តីសម្រេចរបស់ក្រុមប្រឹក្សាសន្តិសុខ ដោយចូលរួមយ៉ាងជិតស្និទ្ធក្នុងការទប់ស្កាត់ការជួញដូរខុសច្បាប់ និងការបញ្ជូនអាវុធ និងជំរុញឲ្យមានការដកទ័ពស៊ីឈ្នួល យុទ្ធជនបរទេស និងកងកម្លាំងបរទេសចេញពីទឹកដីលីប៊ីឲ្យបានឆាប់តាមដែលអាចធ្វើទៅបាន។

លោក Sun ក៏បានសង្កត់ធ្ងន់លើសារៈសំខាន់នៃការកែលម្អស្ថានភាពសេដ្ឋកិច្ច និងមនុស្សធម៌របស់ប្រទេសលីប៊ីផងដែរ៕