លោកប្រធានាធិបតីសហរដ្ឋអាមេរិក Donald Trump កំពុងត្រៀមបង្ក្រាបការធ្វើអន្តោប្រវេសន៍កាន់តែខ្លាំងក្លាជាងមុននៅឆ្នាំ ២០២៦ខាងមុខនេះ ជាមួយនឹងថវិកាថ្មីរាប់ពាន់លានដុល្លារ រួមទាំងការវាយឆ្មក់កន្លែងធ្វើការបន្ថែមទៀត ទោះមានប្រតិកម្មប្រឆាំងកើនឡើងមុនការបោះឆ្នោតពាក់កណ្តាលអាណត្តិឆ្នាំក្រោយក៏ដោយ។   

លោក Trump បានបង្កើនក្រុមភ្នាក់ងារអន្តោប្រវេសន៍ចូលទៅក្នុងទីក្រុងធំៗរបស់សហរដ្ឋអាមេរិករួចហើយ ជាទីដែលពួកគេបានឆ្មក់បង្ក្រាបនៅទូទាំងសង្កាត់នានា និងប៉ះទង្គិចជាមួយអ្នកស្រុក។

ខណៈបណ្ដាភ្នាក់ងារសហព័ន្ធនៅឆ្នាំនេះបានឆ្មក់ចូលលើអាជីវកម្មមួយចំនួន ពួកគេភាគច្រើនបានជៀសវាងការឆ្មក់ចូលតាមកសិដ្ឋាន រោងចក្រ និងអាជីវកម្មផ្សេងទៀតដែលមានសារៈសំខាន់ខាងសេដ្ឋកិច្ច ប៉ុន្តែត្រូវបានគេដឹងថាជួលជនអន្តោប្រវេសន៍ដោយគ្មានឋានៈស្របច្បាប់។

ទីភ្នាក់ងារអនុវត្តច្បាប់ផ្នែកគយ និងអន្តោប្រវេសន៍អាមេរិក ICE និងល្បាតព្រំដែន នឹងទទួលបានថវិកាបន្ថែមចំនួន ១៧០ ពាន់លានដុល្លារអាមេរិករហូតដល់ខែកញ្ញា ឆ្នាំ ២០២៩ ជាការកើនឡើងយ៉ាងច្រើននៃមូលនិធិលើសពីថវិកាប្រចាំឆ្នាំដែលមានស្រាប់របស់ពួកគេប្រហែល១៩ ពាន់លានដុល្លារអាមេរិក បន្ទាប់ពីសភាគ្រប់គ្រងដោយគណបក្សសាធារណរដ្ឋបានអនុម័តកញ្ចប់ចំណាយដ៏ធំមួយក្នុងខែកក្កដា។ 

ក្រុមមន្ត្រីរដ្ឋបាលនិយាយថា ពួកគេមានគម្រោងជួលភ្នាក់ងាររាប់ពាន់នាក់បន្ថែមទៀត បើកមជ្ឈមណ្ឌលឃុំឃាំងថ្មី នាំជនអន្តោប្រវេសន៍បន្ថែមទៀតដាក់ពន្ធនាគារក្នុងស្រុក និងសហការជាមួយក្រុមហ៊ុនខាងក្រៅ ដើម្បីតាមដានមនុស្សដែលគ្មានឋានៈស្របច្បាប់នៅក្នុងសហរដ្ឋអាមេរិក៕