សភារដ្ឋ New South Wales របស់ប្រទេសអូស្ត្រាលី ត្រូវបានកោះប្រជុំឡើងវិញ នៅថ្ងៃចន្ទនេះ ដើម្បីបោះឆ្នោតលើច្បាប់ថ្មីដែលបានស្នើឡើង ដែលនឹងដាក់កម្រិតសំខាន់ៗលើការកាន់កាប់អាវុធ ហាមឃាត់ការបង្ហាញនិមិត្តសញ្ញាភេរវកម្ម និងរឹតត្បិតការតវ៉ា បន្ទាប់ពីការបាញ់ប្រហារដែលបានបណ្តាលឲ្យមនុស្សស្លាប់យ៉ាងច្រើន នៅឆ្នេរ Bondi Beach។

សភារដ្ឋត្រូវបានកោះប្រជុំឡើងវិញរយៈពេលពីរថ្ងៃ ចាប់ពីថ្ងៃចន្ទ ដើម្បីពិភាក្សាអំពីច្បាប់អាវុធ ដែលនឹងកំណត់ចំនួនអាវុធដែលមនុស្សម្នាក់អាចមាននៅត្រឹម ៤ដើម ឬរហូតដល់ ១០ដើម សម្រាប់ក្រុមជាក់លាក់ដូចជាកសិករ។

សាជីវកម្មផ្សព្វផ្សាយអូស្ត្រាលី បាននិយាយនៅក្នុងរបាយការណ៍មួយដោយដកស្រង់ទិន្នន័យរបស់នគរបាលថា បច្ចុប្បន្ននេះ ពុំមានការកំណត់ចំពោះការកាន់កាប់អាវុធទេ ប្រសិនបើហេតុផលអាចត្រូវបានរាប់ជាសុចរិតចំពោះនគរបាល ហើយមានមនុស្សជាង ៥០ នាក់ នៅក្នុងរដ្ឋដែលមានកាំភ្លើងជាង ១០០  ដើម។ 

លោក Sajid Akram អាយុ ៥០ ឆ្នាំ ដែលជាខ្មាន់កាំភ្លើងម្នាក់នៅឆេ្នរ Bondi ត្រូវបានបាញ់សម្លាប់ដោយនគរបាល និងមានអាវុធចំនួន ៦ដើម។ កូនប្រុសអាយុ ២៤ ឆ្នាំ របស់លោក ឈ្មោះ Naveed Akram ត្រូវបានចោទប្រកាន់ពីបទឧក្រិដ្ឋចំនួន ៥៩ ករណី ក្នុងនោះមានឃាតកម្ម និងភេរវកម្ម។ នេះបើយោងតាមនគរបាល។

មនុស្សចំនួន ១៥ នាក់ ត្រូវបានសម្លាប់ និងរាប់សិបនាក់រងរបួស នៅក្នុងការបាញ់ប្រហារដ៏ធំមួយ នៅឯពិធីបុណ្យ Hanukkah របស់ជនជាតិជ្វីហ្វ នៅឆ្នេរ Bondi ក្នុងទីក្រុងស៊ីដនី កាលពីថ្ងៃទី ១៤ ខែធ្នូ។ ការវាយប្រហារនេះ បានធ្វើឲ្យប្រជាជាតិមានការភ្ញាក់ផ្អើល និងបង្កឲ្យមានការអំពាវនាវឲ្យមានច្បាប់អាវុធកាន់តែតឹងរ៉ឹង និងកិច្ចខិតខំប្រឹងប្រែងកាន់តែខ្លាំងឡើង ដើម្បីបញ្ឈប់ការប្រឆាំងនឹងជនជាតិជ្វីហ្វ៕