ប្រធានាធិបតីអាមេរិក លោក Donald Trump កាលពីថ្ងៃចន្ទ បានចេញការព្រមានថ្មីមួយដល់ប្រធានាធិបតីវ៉េណេស៊ុយអេឡា លោក Nicolás Maduro ខណៈកងកម្លាំងសហរដ្ឋអាមេរិក បង្កើនកិច្ចខិតខំប្រឹងប្រែងដើម្បីរឹបអូសនាវាដឹកប្រេងក្នុងសមុទ្រការ៉ាអ៊ីប ជាផ្នែកមួយនៃយុទ្ធនាការដាក់សម្ពាធកាន់តែខ្លាំងឡើងរបស់ទីក្រុងវ៉ាស៊ីនតោន លើរដ្ឋាភិបាលទីក្រុងការ៉ាកាស។

យុទ្ធនាការដាក់សម្ពាធរបស់លោក Trump ទៅលើលោក Maduro រួមមាន វត្តមានយោធាកាន់តែខ្លាំងក្លានៅក្នុងតំបន់ និងការវាយប្រហារដោយយោធាជាង ២០លើកលើនាវាសង្ស័យថាជួញដូរគ្រឿងញៀនដែនទឹកជិតប្រទេសអាមេរិកខាងត្បូងមួយនេះ ដែលបានសម្លាប់មនុស្សយ៉ាងតិច ១០០នាក់មកហើយ។

នៅពេលត្រូវអ្នកសារព័ត៌មានសាកសួរថា តើគោលដៅគឺដើម្បីបង្ខំលោក Maduro ឱ្យចុះពីអំណាចមែនឬទេ លោក Trump ឆ្លើយបែបមិនច្បាស់លាស់ថា “ប្រហែលជាបែបនេះ គឺអាស្រ័យលើលោក Maduro ប៉ុន្តែនេះជាជំហានដ៏ឆ្លាតវៃក្នុងការធ្វើដូច្នេះ”។ លោកក៏បានព្រមានថា "ប្រសិនបើលោក Maduro នៅតែប្រកាន់ឥរិយាបថរឹងរូស នោះនឹងជាលើកចុងក្រោយហើយដែលលោកអាចរឹងរូសបាន"។

បន្ថែមពីលើការវាយប្រហារលើទូកសង្ស័យ លោក Trump ក៏បានប្រកាសពី «ការបិទផ្លូវទាំងស្រុង» លើនាវាជាប់ទណ្ឌកម្មទាំងអស់ដែលដឹកប្រេងចូល និងចាកចេញពីវ៉េណេស៊ុយអេឡា ជាមួយនឹងការរឹបអូសនាវាជាច្រើនគ្រឿង។ នៅពេលត្រូវសាកសួរថា តើនឹងមានអ្វីកើតឡើងចំពោះប្រេងក្នុងនាវាដែលរឹបអូសបាននោះ លោក Trump បានឆ្លើយថា "អាមេរិកប្រហែលជាលក់ ឬក៏អាចទុក" ហើយក៏អាចត្រូវបានប្រើដើម្បីបំពេញបន្ថែមទុនបម្រុងយុទ្ធសាស្ត្ររបស់សហរដ្ឋអាមេរិកផងដែរ៕