រដ្ឋមន្ត្រីការបរទេសទួរគី លោក Hakan Fidan បាននិយាយកាលពីថ្ងៃចន្ទ (២២ ធ្នូ) ថា ទីក្រុងអង់ការ៉ា រំពឹងយ៉ាងមុតមាំថា ដំណាក់កាលទីពីរនៃកិច្ចព្រមព្រៀងឈប់បាញ់នៅតំបន់ហ្កាហ្សា នឹងចាប់ផ្តើមដំណើរការនៅដើមឆ្នាំ២០២៦ ដ៏ខ្លីខាងមុខនេះ បន្ទាប់ពីកិច្ចចរចាជាមួយក្រុមមន្ត្រីអាមេរិក កាតា និងអេហ្ស៊ីប នៅទីក្រុង Miami កាលពីចុងសប្តាហ៍កន្លងទៅ។

ថ្លែងក្នុងសន្និសីទសារព័ត៌មានមួយនៅទីក្រុងដាម៉ាស លោក Fidan បាននិយាយថា ការពិភាក្សានោះបានផ្តោតសំខាន់លើឧបសគ្គនានា ក្នុងការជំរុញកិច្ចព្រមព្រៀងទៅកាន់ដំណាក់កាលបន្ទាប់ ដោយបន្ថែមថា អាទិភាពសំខាន់គឺជាអភិបាលកិច្ចនៃដែនដីហ្កាហ្សា ដែលនឹងត្រូវទទួលយកដោយក្រុមមួយ ដឹកនាំដោយជនជាតិប៉ាឡេស្ទីន។

យោងតាមសេចក្តីថ្លែងការណ៍រួមមួយ ដែលចេញកាលពីថ្ងៃសៅរ៍ដោយប្រេសិតអាមេរិក លោក Steve Witkoff បានឱ្យដឹងថា អ្នកតំណាងមកពីសហរដ្ឋអាមេរិក អេហ្ស៊ីប កាតា និងទួរគី បានជួបប្រជុំគ្នាកាលពីថ្ងៃសុក្រសប្ដាហ៍មុន នៅទីក្រុង Miami ដើម្បីពិនិត្យឡើងវិញនូវជំហានបន្ទាប់លើបទឈប់បាញ់ហ្កាហ្សា ក្រោមផែនការសន្តិភាពរបស់លោកប្រធានាធិបតីអាមេរិក Donald Trump។

ដំណាក់កាលទីពីរនៃផែនការសន្តិភាពនេះមានន័យថា កងទ័ពអ៊ីស្រាអែលត្រូវដកថយបន្ថែមទៀត ការបង្កើតអាជ្ញាធរបណ្ដោះអាសន្នដើម្បីគ្រប់គ្រងទឹកដីប៉ាឡេស្ទីននេះ ការដាក់ពង្រាយកងកម្លាំងសន្តិសុខអន្តរជាតិ និងការរំសាយអាវុធរបស់ក្រុមសកម្មប្រយុទ្ធហាម៉ាស៕