មន្ត្រីអង្គការគ្រូពេទ្យគ្មានព្រំដែន (MSF) បានព្រមានថា គ្រួសារភៀសខ្លួនស៊ូដង់ នៅក្នុងតំបន់ Darfur ដែលរងការបំផ្លិចបំផ្លាញដោយសង្គ្រាម កំពុងប្រឈមការផ្ទុះឡើងជំងឺកញ្ជ្រឹលដ៏គ្រោះថ្នាក់ខណៈរាលដាលយ៉ាងឆាប់រហ័ស។

លោកវេជ្ជបណ្ឌិត អាលី អាល់ម៉ូហាំម៉េដ(Ali Almohammed) អ្នកគ្រប់គ្រងសុខភាពសង្គ្រោះបន្ទាន់របស់អង្គការគ្រូពេទ្យគ្មានព្រំដែន(MSF) បាននិយាយថា ក្រុមរបស់លោក «មានការព្រួយបារម្ភយ៉ាងខ្លាំង» ចំពោះករណីជំងឺកញ្ជ្រឹលដែលមកដល់ជារៀងរាល់ថ្ងៃនៅមន្ទីរពេទ្យក្នុងទីក្រុង South Darfur ជាកន្លែងដែលគ្រូពេទ្យគ្មានព្រំដែន ផ្តល់ការថែទាំសុខភាពកុមារ និងមាតា។

លោក Almohammed បាននិយាយនៅក្នុងបទសម្ភាសន៍មួយពីទីក្រុងអាំស្ទែរដាំ(Amsterdam) ថា «យើងមានគ្រែចំនួន២៥ សម្រាប់ការដាក់ឲ្យនៅដោយឡែកអ្នកជំងឺកញ្ជ្រឹល ប៉ុន្តែជារៀងរាល់ថ្ងៃចំនួនករណីកំពុងកើនឡើង»។

លោកនិយាយថា «សមត្ថភាពរបស់គ្រូពេទ្យគ្មានព្រំដែន(MSF) ក្នុងការឆ្លើយតបទៅនឹងតម្រូវការទាំងអស់របស់ប្រជាជននៅទីក្រុង Darfur មានកម្រិតពិតប្រាកដ។ យើងមិនអាចគ្របដណ្តប់អ្វីៗគ្រប់យ៉ាងបានទេ។ យើងកំពុងព្យាយាមផ្តោតលើការថែទាំសុខភាពដែលជួយសង្គ្រោះជីវិត ប៉ុន្តែសមត្ថភាពរបស់យើងក៏មានកម្រិតដែរ»។ ការផ្ទុះឡើងជំងឺកញ្ជ្រឹល ដែលជាវីរុសអាចទប់ស្កាត់បានដោយវ៉ាក់សាំង បានកើតឡើងខណៈអំពើហិង្សារវាងយោធាស៊ូដង់ និងកងកម្លាំងគាំទ្ររហ័ស (RSF) នៅក្នុងតំបន់ភាគខាងលិចទីក្រុង Darfur និងតំបន់ជិតខាង បានកើនឡើងក្នុងរយៈពេលប៉ុន្មានសប្តាហ៍ថ្មីៗនេះ។

មនុស្សជាង១សែននាក់ បានភៀសខ្លួនចេញពីលំនៅឋានរបស់ពួកគេនៅទីក្រុង el-Fasher ជារដ្ឋធានីនៃរដ្ឋ North Darfur បន្ទាប់ពីកងកម្លាំងគាំទ្ររហ័ស(RSF) ដណ្តើមបានការគ្រប់គ្រងទីក្រុងនេះកាលពីចុងខែតុលា បន្ទាប់ពីការហ៊ុមព័ទ្ធរយៈពេល១៨ខែ។