រដ្ឋមន្ត្រីសន្តិសុខបាននិយាយកាលពីថ្ងៃអាទិត្យ (ទី ២១ ខែធ្នូ)ថា សូម៉ាលីនឹងដាក់ពង្រាយកម្លាំងសន្តិសុខជាង ១០.០០០ នាក់ នៅក្នុងរដ្ឋធានីម៉ូហ្គាឌីស្យូ មុនពេលការបោះឆ្នោតក្នុងស្រុក នៅសប្តាហ៍ក្រោយ ដែលជា ការបោះឆ្នោតដោយផ្ទាល់លើកដំបូង ក្នុងរយៈពេលជិត ៦០ឆ្នាំ។

ប្រទេសអាហ្វ្រិកខាងកើតនេះ កំពុងតស៊ូដើម្បីចេញពីជម្លោះ និងភាពវឹកវររាប់ទសវត្សរ៍ ដោយប្រយុទ្ធប្រឆាំងនឹងការបះបោរបង្ហូរឈាម និងគ្រោះមហន្តរាយធម្មជាតិញឹកញាប់។

កាលពីខែមេសា ប្រទេសនេះបានចាប់ផ្តើមការចុះឈ្មោះបោះឆ្នោតជាលើកដំបូង ក្នុងរយៈពេលជាច្រើនទសវត្សរ៍ ដែលជាជំហានមួយឆ្ពោះទៅរកការបោះឆ្នោតជាសកល និងបញ្ចប់ប្រព័ន្ធបោះឆ្នោតដោយប្រយោល ដែលបានផ្តោតទៅលើញាតិសណ្តានដ៏ស្មុកស្មាញ ចាប់តាំងពីឆ្នាំ ១៩៦៩។

ការបោះឆ្នោតនៅថ្ងៃទី ២៥ ខែធ្នូ ដែលគណបក្សប្រឆាំងបានធ្វើពហិការ ដោយចោទប្រកាន់រដ្ឋាភិបាលសហព័ន្ធថា «ដំណើរការបោះឆ្នោតឯកតោភាគី»នឹងឃើញបេក្ខជនជាង ១.៦០០ នាក់ ប្រកួតប្រជែងយក អាសនៈក្នុងស្រុកចំនួន ៣៩០ នៅក្នុងតំបន់ Banadir ភាគអាគ្នេយ៍។

យោងតាមស្ថាប័នបោះឆ្នោតរបស់ប្រទេសនេះ មនុស្សជិត ៤០០.០០០ នាក់ បានចុះឈ្មោះបោះឆ្នោត។ 

រដ្ឋមន្ត្រីសន្តិសុខជាតិ លោក Abdullahi Sheikh Ismail បាននិយាយនៅក្នុងសេចក្តីថ្លែងការណ៍មួយថា៖  «យើងបាននិងកំពុងប្រឹងប្រែងដើម្បីធានាសុវត្ថិភាពទីក្រុងនេះ»។ 

លោក Abdikarin Ahmed Hassan ប្រធានគណៈកម្មការរៀបចំការបោះឆ្នោត បាននិយាយថា ការធ្វើដំណើរទាំងអស់ នឹងត្រូវបានកំណត់ នៅថ្ងៃបោះឆ្នោត ដោយអ្នកបោះឆ្នោតត្រូវបានដឹកជញ្ជូនទៅកាន់ការិយាល័យបោះឆ្នោតដោយរថយន្តក្រុង៕