កងកម្លាំងរដ្ឋាភិបាលស៊ីរី និងកងកម្លាំងប្រជាធិបតេយ្យស៊ីរី (SDF)ដឹកនាំដោយជនជាតិឃើដ បានយល់ព្រមបន្ធូរបន្ថយភាពតានតឹង កាលពីល្ងាចថ្ងៃចន្ទ នៅទីក្រុងអាឡេប៉ូភាគខាងជើង បន្ទាប់ពីរលកនៃការវាយប្រហារដែលភាគីទាំងពីរបានស្តីបន្ទោសគ្នាទៅវិញទៅមក បានបង្កឲ្យជនស៊ីវិលយ៉ាងហោចណាស់ ពីរនាក់ ស្លាប់ និងជាច្រើននាក់ រងរបួស។

ទីភ្នាក់ងារសារព័ត៌មានរដ្ឋស៊ីរី SANA ដែលបានដកស្រង់សម្តីក្រសួងការពារជាតិ បាននិយាយថា ទីបញ្ជាការទូទៅរបស់កងទ័ព បានចេញបញ្ជាឲ្យបញ្ឈប់ការកំណត់គោលដៅទៅលើប្រភពបាញ់ប្រហារ របស់កងកម្លាំងប្រជាធិបតេយ្យស៊ីរី (SDF)។ កងកម្លាំង SDF បាននិយាយនៅក្នុងសេចក្តីថ្លែងការណ៍មួយ នៅពេលក្រោយមកនោះថា ខ្លួនបានចេញការណែនាំឲ្យបញ្ឈប់ការឆ្លើយតបទៅនឹងការវាយប្រហារដោយកងកម្លាំងរដ្ឋាភិបាលស៊ីរី បន្ទាប់ពីធ្វើការទំនាក់ទំនងដើម្បីបន្ធូរបន្ថយភាពតានតឹង។

ក្រសួងសុខាភិបាលស៊ីរី បាននិយាយថា មនុស្ស ពីរនាក់ ត្រូវបានសម្លាប់ និងជាច្រើននាក់រងរបួស នៅក្នុងការបាញ់ផ្លោងដោយកងកម្លាំងប្រជាធិបតេយ្យស៊ីរី ទៅលើសង្កាត់លំនៅឋាន នៅក្នុងទីក្រុងអាឡេប៉ូ។ អ្នករងរបួស រួមមានកុមារ ពីរនាក់ និងបុគ្គលិកការពារជនស៊ីវិល ពីរនាក់។ អំពើហិង្សា បានផ្ទុះឡើងរយៈពេលប៉ុន្មានម៉ោងបន្ទាប់ពីរដ្ឋមន្ត្រីការបរទេសទួរគី លោក Hakan Fidan បាននិយាយក្នុងអំឡុងពេលទស្សនកិច្ចនៅទីក្រុងដាម៉ាសថា កងកម្លាំងប្រជាធិបតេយ្យស៊ីរីហាក់ដូចជាមិនមានបំណងគោរពការប្តេជ្ញាចិត្តក្នុងការធ្វើសមាហរណកម្មទៅក្នុងកងកម្លាំងប្រដាប់អាវុធរបស់រដ្ឋ តាមកាលកំណត់ចុងឆ្នាំ ដែលបានព្រមព្រៀងគ្នានោះទេ។

ប្រទេសទួរគី ចាត់ទុកកងកម្លាំង SDF ដែលគាំទ្រដោយសហរដ្ឋអាមេរិក ដែលគ្រប់គ្រងតំបន់ភាគឦសាននៃប្រទេសស៊ីរី ជាអង្គការភេរវកម្ម ហើយបានព្រមានអំពីសកម្មភាពយោធា ប្រសិនបើក្រុមនេះ មិនគោរពកិច្ចព្រមព្រៀង៕