លោកប្រធានាធិបតី Donald Trump កាលពីថ្ងៃចន្ទ (ទី២២ ខែធ្នូ) បានរំលឹកឡើងវិញនូវបំណងប្រាថ្នារបស់លោក ដែលចង់ឲ្យសហរដ្ឋអាមេរិកគ្រប់គ្របលើដែនដី Greenland បន្ទាប់ពីបានប្រកាសពីផែនការតែងតាំងអភិបាលរដ្ឋ Louisiana លោក Jeff Landry ជាបេសកជនពិសេសប្រចាំកោះនេះ។

កាលពីថ្ងៃទី២២ ខែធ្នូ នៅឯគេហដ្ឋានដ៏ស្កឹមស្កៃ Mar-a-Lago របស់លោក ក្នុងរដ្ឋ Florida លោក Trump បានប្រាប់អ្នកសារព័ត៌មានថា៖ «យើងត្រូវការវា (Greenland) ដើម្បីសន្តិសុខជាតិ។ យើងត្រូវតែបានគ្រប់គ្រងវា។ ហើយគាត់ (លោក Landry) ចង់ដឹកនាំកិច្ចប្រឹងប្រែងនេះ»។

លោកប្រធានាធិបតី បានបញ្ជាក់ថា លោក Landry គឺជា «អ្នកពូកែខាងចរចាធ្វើកិច្ចព្រមព្រៀង» ដែលអាចជួយអនុវត្តចក្ខុវិស័យរបស់លោក ក្នុងការកាន់កាប់ដែនដីនេះ។ លោក Trump បាននិយាយថា៖ «អ្នកមើលទៅតាមបណ្ដោយឆ្នេរសមុទ្រនេះចុះ អ្នកនឹងឃើញមាននាវារុស្ស៊ី និងចិនជាច្រើនគ្រឿង នៅគ្រប់កន្លែង»។

ជាមួយគ្នានេះ មេដឹកនាំអាមេរិករូបនេះ ក៏បានឲ្យដឹងផងដែរថា បំណងប្រាថ្នារបស់លោក មិនមែនដោយសារតែចង់បានធនធានថាមពល ឬរ៉ែរបស់កោះ Greenland ឡើយ ដោយបានសង្កត់ធ្ងន់ថា សហរដ្ឋអាមេរិកមានធនធានច្រើនហើយ ប៉ុន្តែលោកផ្ដល់ហេតុផលថា លោកមិនជឿថា ប្រទេសដាណឺម៉ាកបានលះបង់ការចំណាយគ្រប់គ្រាន់ ដើម្បីការពារកោះនេះនោះទេ។

គួរបញ្ជាក់ថា កោះ Greenland គឺជាទឹកដីឯករាជ្យរបស់ដាណឺម៉ាក ដោយមានរដ្ឋាភិបាលស្វយ័ត និងសភាផ្ទាល់របស់ដែនដី។ លោក Trump បានបង្ហាញការចាប់អារម្មណ៍យ៉ាងខ្លាំង ក្នុងការកាន់កាប់កោះ Greenland បន្ទាប់ពីមានគំនិតដំបូងចង់ទិញដែនដីនេះពីដាណឺម៉ាកកាលពី ៦ឆ្នាំមុន។ ប៉ុន្តែលោកប្រធានាធិបតី បាននិយាយអំពីវាកាន់តែច្រើនឡើងៗ នៅក្នុងអាណត្តិទី២ របស់លោក ហើយបានបញ្ជូនមន្ត្រីអាមេរិកសំខាន់ៗ រួមមានអនុប្រធានាធិបតី លោក J.D. Vance និងរដ្ឋមន្ត្រីថាមពល លោក Chris Wright ទៅកាន់កោះអាកទិកនេះ។ លោក Donald Trump Jr ដែលជាកូនប្រុសច្បងរបស់ប្រធានាធិបតី ក៏បានទៅទស្សនកិច្ចផងដែរ កាលពីខែមករា មុន ពេលលោក Trump ស្បថចូលកាន់តំណែងជាលើកទី២៕