ក្រុមមន្រ្តីបាននិយាយថា ការផ្ទុះពីរលើកនិងអគ្គិភ័យដ៏ធំមួយ ដែលទំនងជាបណ្តាលមកពីការលេចធ្លាយឧស្ម័ន បានឆាបឆេះមណ្ឌលថែទាំមនុស្សចាស់មួយកន្លែង ជិតទីក្រុង Philadelphia រដ្ឋ Pennsylvania សហរដ្ឋអាមេរិក កាលពីថ្ងៃអង្គារ (២៣ ធ្នូ) ដោយសម្លាប់មនុស្សយ៉ាងតិច ២នាក់ និងនាំឱ្យនគរបាលបើកប្រតិបត្តិការទ្រង់ទ្រាយធំដើម្បីស្វែងរកជនរងគ្រោះផ្សេងទៀត ក្នុងផ្នែកបាក់រលំនៃអគារ។

លោក Kevin Dippolito ប្រធានការិយាល័យពន្លត់អគ្គិភ័យប្រចាំតំបន់ Bristol បាននិយាយថា មនុស្ស ៥នាក់ ត្រូវគេជឿថាបានបាត់ខ្លួន ប៉ុន្មានម៉ោងបន្ទាប់ពីការផ្ទុះ និងអណ្តាតភ្លើងបានបំផ្លាញមណ្ឌលចាស់ជរា ឈ្មោះ Silver Lake ក្នុងទីប្រជុំជន Bristol ចម្ងាយប្រហែល ៣៣គីឡូម៉ែត្រ ភាគឦសាននៃទីក្រុង Philadelphia។

លោក Dippolito បានបន្តថា ក្រៅពីអ្នកស្លាប់ ២នាក់នោះ មានមនុស្សមួយចំនួនទៀតបានរួចជីវិតនិងរងរបួស ហើយអ្នកជំងឺ និងបុគ្គលិកជាច្រើននាក់ ដែលដំបូងឡើយជាប់នៅខាងក្នុងផ្នែកបាក់រលំនៃអគារ ត្រូវបានជួយសង្គ្រោះហើយ ខណៈប្រតិបត្តិការស្វែងរកនៅតែបន្ត។

ចំនួនពិតប្រាកដនៃអ្នកជំងឺ និងបុគ្គលិកនៅទីនោះមិនទាន់ច្បាស់ភ្លាមៗទេ ប៉ុន្តែយោងតាមគេហទំព័រផ្លូវការរបស់អ្នកផ្តល់សេវាថែទាំ Medicare បានឱ្យដឹងថា មណ្ឌលថែទាំមនុស្សចាស់នេះត្រូវបានបញ្ជាក់ថា មានគ្រែរហូតដល់ ១៧៤គ្រែ៕