ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃអង្គារ (២៣ ធ្នូ) ថា ឯកសារព្រាងជាច្រើនច្បាប់ រួមទាំងការធានាសន្តិសុខ ត្រូវបានរៀបចំរួចរាល់ហើយ បន្ទាប់ពីកិច្ចចរចារវាងក្រុមមន្ត្រីសហរដ្ឋអាមេរិក និងភាគីអ៊ុយក្រែន នៅទីក្រុង ម៉ៃអាមី (Miami) កាលពីចុងសប្ដាហ៍កន្លងទៅ ស្តីពីការបញ្ចប់សង្គ្រាមជិត ៤ឆ្នាំរបស់រុស្ស៊ី នៅអ៊ុយក្រែន។

គួរឱ្យដឹងថា ក្រុមមន្ត្រីអាមេរិក បានបើកកិច្ចចរចានៅទីក្រុងម៉ៃអាមី កាលពីចុងសប្តាហ៍មុន ជាមួយគណៈប្រតិភូអ៊ុយក្រែន និងអឺរ៉ុប ហើយបានធ្វើកិច្ចចរចាដាច់ដោយឡែកពីគ្នាផ្សេងទៀត នៅរដ្ឋ Florida ជាមួយតំណាងមកពីរុស្ស៊ី ខណៈទីក្រុងវ៉ាស៊ីនតោន កំពុងស្ទាបស្ទង់វិសាលភាពសម្រាប់ការដោះស្រាយជម្លោះ នៅក្នុងសង្គ្រាមដ៏បង្ហូរឈាមជាច្រើនឆ្នាំមកនេះ។

អ៊ុយក្រែន កំពុងស្ថិតក្រោមសម្ពាធរបស់ទីក្រុងវ៉ាស៊ីនតោន ដែលចង់ធានាបានសន្តិភាពឆាប់រហ័ស ហើយទីក្រុងគីវ បានព្យាយាមធ្វើឱ្យមានតុល្យភាពរវាងសំណើសន្តិភាពដំបូង ដែលត្រូវបានគេមើលឃើញយ៉ាងទូលំទូលាយថា អំណោយផលដល់ទីក្រុងមូស្គូ ដែលទាមទារឱ្យអ៊ុយក្រែនប្រគល់ទឹកដីបន្ថែមទៀត និងរឹតត្បិតសមត្ថភាពយោធារបស់ខ្លួន។

បន្ទាប់ពីស្ដាប់ការសង្ខេបពីក្រុមអ្នកចរចាអ៊ុយក្រែន លោកប្រធានាធិបតី Zelenskyy បានបង្ហោះសារលើបណ្ដាញសង្គម X ថា “ក្រុមមន្រ្តីបានធ្វើការប្រកបដោយផលិតភាព ជាមួយប្រេសិតពិសេសរបស់លោកប្រធានាធិបតីអាមេរិក Donald Trump ហើយឯកសារព្រាងជាច្រើនច្បាប់ ត្រូវបានរៀបចំរួចរាល់ហើយ”។ លោកបន្តថា៖ "ឯកសារទាំងនេះរួមមាន ឯកសារស្តីពីការធានាសន្តិសុខសម្រាប់អ៊ុយក្រែន ស្តីពីការស្តារឡើងវិញ និងស្តីពីក្របខណ្ឌមូលដ្ឋានសម្រាប់បញ្ចប់សង្គ្រាមមួយនេះ"៕