​បាល់ទាត់៖ ​ក្លិប​នៅ​លី​គ​កំពូល​បារាំង Nice បាន​ឈានឡើង​វគ្គ​ផ្តាច់ព្រ័ត្រ​ពានរង្វាន់ French Cup រឺ Coupe de France ជា​លើកដំបូង​ក្នុង​រយៈពេល ២៥​ឆ្នាំក្រោយ​យកឈ្នះ​ក្រុម​នៅ​លី​គ​ទី​៤ Versailles ២-០​។

​​ក្រុម​ម្ចាស់ផ្ទះ Nice មានឱកាស​ជាច្រើន​គ្របដណ្តប់​លើ​ក្រុម​ភ្ញៀវ តែ​គ្រាប់​បាល់​ជ័យជំនះ​ត្រូវ​រង់ចាំ​នៅ​វគ្គ​ទី២ សំរេចបាន​ដោយ Amine Gouiri និង Kasper Dolberg ដើម្បី​បញ្ចប់​ដំណើរ​ផ្សងព្រេង​របស់ Versailles ដែល​បាន​យកឈ្នះគូប្រកួត ៦ក្រុម​មកហើយ​ទំរាំ​ឡើងមក​ដល់​វគ្គ​ពាក់កណ្តាល​ផ្តាច់ព្រ័ត្រ​នេះ តែ​គូប្រកួត​ទាំងអស់នោះ​មិនមាន​ក្រុម​នៅ​លី​គ​កំពូល​ឡើយ​។​ ​​Versailles ក៏បាន​ក្លាយជា​ក្លិប​នៅ​លី​គ​លំដាប់​ក្រោម​មួយទៀត​ ដែលមាន​ដំណើរ​វែងឆ្ងាយ​នៅ French Cup នេះបន្ទាប់ពី​ក្លិប​នៅ​លី​គ​ទី៣ Les Herbiers ធ្លាប់​ឡើង​វគ្គ​ផ្តាច់ព្រ័ត្រ ២០១៨ ចាញ់ Paris Saint Germain និង​ក្លិប​នៅ​លី​គ​ទី៤ មួយទៀត Calais ចាញ់ Nantes វគ្គ​ផ្តាច់ព្រ័ត្រ​ឆ្នាំ២០០០​។​

​​ចំណែក Nice ធ្លាប់​ឡើង​វគ្គ​ផ្តាច់ព្រ័ត្រ​ចុងក្រោយ​បំផុត​នៅ​ឆ្នាំ១៩៩៧ នៅពេល​យកឈ្នះ En Avant Guingamp ដោយ​បាល់ ១១ម៉ែត្រ​កាត់សេចក្តី​។ ​គូប្រកួត​វគ្គ​ផ្តាច់ព្រ័ត្រ​របស់ Nice គឺ Nantes រឺ Monaco ដែល​ជួបគ្នា​យប់​នេះ​វគ្គ​ពាក់កណ្តាល​ផ្តាច់ព្រ័ត្រ​៕

​អត្ថបទ​៖​នាង សុភា​វុ​ធ