បែលហ្ស៊ិកកាលពីថ្ងៃអង្គារបានចូលរួមជាមួយអាហ្វ្រិកខាងត្បូងក្នុងសំណុំរឿងមួយ ដែលបានប្តឹងទៅតុលាការយុត្តិធម៌អន្តរជាតិ (ICJ) ដែលចោទប្រកាន់អ៊ីស្រាអែលពីបទប្រល័យពូជសាសន៍នៅតំបន់ ហ្កាហ្សា។

តុលាការកំពូលរបស់អង្គការសហប្រជាជាតិដែលមានមូលដ្ឋាននៅទីក្រុងឡាអេ បាននិយាយនៅក្នុងសេចក្តីថ្លែងការណ៍មួយថា ទីក្រុងប្រ៊ុចសែលបានដាក់លិខិតសេចក្តីប្រកាសអន្តរាគមន៍។

ប្រទេសជាច្រើនរួមមានប្រេស៊ីល កូឡុំប៊ី អៀរឡង់ ម៉ិកស៊ិក អេស្ប៉ាញ និងទួរគី បានចូលរួមសំណុំរឿងនេះរួចហើយ។

នៅក្នុងខែធ្នូ ឆ្នាំ២០២៣ អាហ្វ្រិកខាងត្បូងបាននាំយកសំណុំរឿងមួយទៅកាន់តុលាការកំពូលរបស់UN នៅទីក្រុងឡាអេ ដោយចោទប្រកាន់ថា ការវាយលុករបស់អ៊ីស្រាអែលនៅតំបន់ហ្កាហ្សា បានរំលោភលើ   អនុសញ្ញាអង្គការសហប្រជាជាតិឆ្នាំ ១៩៤៨ ស្តីពីការបង្ការ និងការផ្តន្ទាទោសចំពោះឧក្រិដ្ឋកម្មប្រល័យពូជសាសន៍។ អ៊ីស្រាអែលបដិសេធការចោទប្រកាន់នេះ។

នៅក្នុងសេចក្តីសម្រេចក្នុងខែមករា ខែមីនា និងខែឧសភា ឆ្នាំ២០២៤ តុលាការ ICJ បានប្រាប់អ៊ីស្រាអែលឲ្យធ្វើអ្វីគ្រប់យ៉ាងដែលអាចធ្វើទៅបាន ដើម្បីទប់ស្កាត់សកម្មភាពប្រល័យពូជសាសន៍នៅតំបន់ហ្កាហ្សា រួមទាំងការផ្តល់ជំនួយមនុស្សធម៌ដែលត្រូវការជាបន្ទាន់ ដើម្បីទប់ស្កាត់គ្រោះទុរ្ភិក្ស។

សេចក្តីសម្រេចទាំងនេះ មានកាតព្វកិច្ចតាមផ្លូវច្បាប់ ប៉ុន្តែតុលាការនេះ មិនមានមធ្យោបាយជាក់ស្តែង ដើម្បីអនុវត្តពួកវានោះទេ។

អ៊ីស្រាអែលបានរិះគន់ដំណើរការនេះ ហើយបានច្រានចោលការចោទប្រកាន់ទាំងនោះ៕  

ការវាយប្រហាររបស់ក្រុមហាម៉ាសនៅថ្ងៃទី ០៧ ខែតុលា ឆ្នាំ ២០២៣ បានបណ្តាលឲ្យ មនុស្ស ១.២២១ នាក់ ស្លាប់នៅខាងអ៊ីស្រាអែល ភាគច្រើនជាជនស៊ីវិល។ នេះបើយោងតាមការរាប់ចំនួនសរុបរបស់សារព័ត៌មាន AFP ដែលផ្អែកលើតួលេខផ្លូវការរបស់អ៊ីស្រាអែល៕