រដ្ឋាភិបាលប្រេស៊ីល បានប្រកាសកាលពីថ្ងៃអង្គារអំពីការវិលត្រឡប់របស់ពលរដ្ឋប្រេស៊ីល៨១នាក់ត្រូវបាននិរទេសចេញពីសហរដ្ឋអាមេរិក ដែលនាំឱ្យចំនួនសរុបនៃជនមាតុភូមិនិវត្តពីសហរដ្ឋអាមេរិកនៅឆ្នាំ២០២៥នេះ បានកើនឡើងដល់ជាង ៣.០០០នាក់ ក្នុងពេលមានគោលនយោបាយអន្តោប្រវេសន៍ដ៏តឹងរ៉ឹងរបស់លោកប្រធានាធិបតីសហរដ្ឋអាមេរិក Donald Trump។

ក្រសួងសិទ្ធិមនុស្សនិងសញ្ជាតិប្រេស៊ីល បាននិយាយនៅក្នុងសេចក្តីថ្លែងការណ៍ថា បន្ទាប់ពីមនុស្ស ៨១នាក់បានទៅដល់ប្រទេសប្រេស៊ីលកាលពីល្ងាចថ្ងៃចន្ទ ផ្នែកមួយនៃក្រុមនេះត្រូវបានផ្ទេរទៅកាន់សណ្ឋាគារមួយមានជំនួយពិសេស ជាកន្លែងដែលជនអន្តោប្រវេសន៍ត្រូវបាននិរទេស ទទួលបានអាហារ សម្ភារៈអនាម័យ ការគាំទ្រផ្លូវចិត្ត ការនិងថែទាំសុខភាព ព្រមទាំងការណែនាំនិងជំនួយសម្រាប់ការធ្វើដំណើរទៅកាន់ទីក្រុងកំណើតរបស់ពួកគេ។

ប្រតិបត្តិការនេះ គឺជាផ្នែកមួយនៃកម្មវិធីអន្តរក្រសួង «Here Is Brazil» ក្នុងគោលបំណងធានាបាននូវភាពស្ងប់ស្ងាត់ និងប្រសិទ្ធភាពកាន់តែប្រសើរនៅក្នុងដំណើរការផ្តល់ជំនួយ។ ចាប់តាំងពីដើមឆ្នាំ២០២៥ មក កម្មវិធីនេះបានអនុវត្តប្រតិបត្តិការចំនួន ៣៦ លើក ដែលផ្តល់លទ្ធភាពដល់ពលរដ្ឋប្រេស៊ីលជាង ៣.០០០នាក់មកពីសហរដ្ឋអាមេរិក។