សម្តេច ប៉ាប ឡេអូ ទី១៤ (Pope Leo XIV) កាលពីថ្ងៃអង្គារ (ទី២៣ ខែធ្នូ) បានអំពាវនាវឲ្យមានបទឈប់បាញ់ជាសកលនៅថ្ងៃបុណ្យណូអែល ហើយបានបង្ហាញនូវព្រះហឫទ័យ «សោកស្ដាយយ៉ាងខ្លាំង» ដែល «រុស្ស៊ីបានបដិសេធសំណើនេះយ៉ាងជាក់ស្តែង»។

សម្ដេច ឡេអូ បានប្រាប់អ្នកសារព័ត៌មានពីទីក្រុង Castel Gandolfo ក្បែរទីក្រុងរ៉ូម ប្រទេសអ៊ីតាលីថា៖ «ខ្ញុំកំពុងលើកឡើងជាថ្មីនូវសំណើរបស់ខ្ញុំ ចំពោះមនុស្សទាំងអស់ដែលមានឆន្ទៈក្នុងការគោរពថ្ងៃសន្តិភាព យ៉ាងហោចណាស់នៅថ្ងៃដ៏ពិសិដ្ឋដែលព្រះអម្ចាស់ជួយសង្គ្រោះរបស់យើងចាប់កំណើត»។

រុស្ស៊ីបានឈ្លានពានអ៊ុយក្រែន ក្នុងខែកុម្ភៈ ឆ្នាំ២០២២ ហើយបានបដិសេធម្តងហើយម្តងទៀតនូវការអំពាវនាវឲ្យមានបទឈប់បាញ់ ដោយប្រាប់ថា ការធ្វើបែបនោះ នឹងគ្រាន់តែផ្តល់ផលចំណេញផ្នែកយោធាដល់អ៊ុយក្រែនប៉ុណ្ណោះ។

សម្តេច ប៉ាប បានមានព្រះបន្ទូលថា៖ «ក្នុងចំណោមរឿងដែលធ្វើឲ្យខ្ញុំសោកសៅជាពន់ពេកនោះ គឺការណ៍ដែលរុស្ស៊ីបានបដិសេធសំណើសុំឲ្យមានបទឈប់បាញ់»។ ដោយសំដៅទៅលើជម្លោះទូទៅ សម្ដេច ឡេអូ បានមានព្រះបន្ទូលបន្ថែមថា៖ «ខ្ញុំសង្ឃឹមថា ពួកគេនឹងស្តាប់ ហើយនឹងមានសន្តិភាព ២៤ម៉ោង នៅក្នុងពិភពលោកទាំងមូល»។

គួរបញ្ជាក់ថា មកទល់ពេលនេះ មិនទាន់មានសញ្ញាពីការទម្លាយភាពទាល់ច្រកនៅឡើយ បន្ទាប់ពីអ្នកចរចាជាន់ខ្ពស់ ទាំងខាងរុស្ស៊ី និងអ៊ុយក្រែន បានមានវត្តមាននៅទីក្រុង Miami សហរដ្ឋអាមេរិក កាលពីចុងសប្តាហ៍មុន ដើម្បីបើកកិច្ចប្រជុំដាច់ដោយឡែកពីគ្នាជាមួយមន្ត្រីអាមេរិកដែលប្រឹងប្រែងឲ្យមានកិច្ចព្រមព្រៀង ដើម្បីបញ្ចប់ការប្រយុទ្ធគ្នាជិត ៤ឆ្នាំ៕