យោងតាមប្រព័ន្ធផ្សព្វផ្សាយរដ្ឋ KCNA បានឱ្យដឹងនៅថ្ងៃព្រហស្បតិ៍ (២៥ ធ្នូ) នេះថា មេដឹកនាំកូរ៉េខាងជើង លោក គីម ជុងអ៊ុន បានទៅត្រួតពិនិត្យការបាញ់សាកល្បងនូវមីស៊ីលបាញ់ពីដីទៅលើអាកាស រយៈចម្ងាយឆ្ងាយ កាលពីថ្ងៃពុធកន្លងទៅ នៅទីតាំងបាញ់បង្ហោះមួយក្បែរឆ្នេរភាគខាងកើតរបស់ប្រទេស។

KCNA បាននិយាយថា ការសាកល្បង -- ដែលមានគោលបំណងវាយតម្លៃបច្ចេកវិទ្យាយុទ្ធសាស្ត្ររបស់ប្រទេសមានអាវុធនុយក្លេអ៊ែរមួយនេះសម្រាប់ការអភិវឌ្ឍមីស៊ីលរយៈកម្ពស់ខ្ពស់ប្រភេទថ្មី -- បានបំផ្លាញគោលដៅនៅលើអាកាសពីរយៈចម្ងាយដល់ទៅ ២០០គីឡូម៉ែត្រ។

KCNA បានបន្តថា លោក គីម ក៏បានត្រួតពិនិត្យការងារសាងសង់នៅទីតាំងដាច់ដោយឡែកមួយទៀត លើនាវាមុជទឹកដើរដោយថាមពលនុយក្លេអ៊ែរទម្ងន់ ៨.៧០០តោន ដែលមានសមត្ថភាពបាញ់មីស៊ីលពីដីទៅអាកាសបែបនេះ។ សេចក្ដីរាយការណ៍បានស្រង់សម្ដីលោក គីម ថា ការអភិវឌ្ឍសមត្ថភាពនុយក្លេអ៊ែរ និងការធ្វើទំនើបកម្មកងទ័ពជើងទឹកយ៉ាងពេញទំហឹង គឺមានសារៈសំខាន់ និងជៀសមិនរួច ខណៈ «ពិភពលោកបច្ចុប្បន្នមិនមានសន្តិភាពទាល់តែសោះ»។

លោក គីម ក៏បាននិយាយផងដែរថា ផែនការរបស់កូរ៉េខាងត្បូង សម្រាប់ការអភិវឌ្ឍនាវាមុជទឹកនុយក្លេអ៊ែរ ដែលបានព្រមព្រៀងជាមួយទីក្រុងវ៉ាស៊ីនតោន នឹងបង្កើនភាពតានតឹងលើឧបទ្វីបកូរ៉េបន្ថែមទៀត ហើយនិងបង្កហានិភ័យដល់សន្តិសុខជាតិ ដែលទាមទារឱ្យលោកត្រូវតែចាត់វិធានការ៕