ក្រុមប្រឹក្សាជាតិរៀបចំការបោះឆ្នោត (CNE) របស់ហុងឌុយរ៉ាស បានប្រកាសថា លោក Nasry Asfura គឺជាអ្នកឈ្នះក្នុងការបោះឆ្នោតប្រធានាធិបតីរបស់ប្រទេសនេះ បន្ទាប់ពីភាពតានតឹង និងការពន្យារពេលជាច្រើនសប្តាហ៍ ជុំវិញបញ្ហាបច្ចេកទេស និងការចោទប្រកាន់ពីការក្លែងបន្លំសន្លឹកឆ្នោត។

ក្រុមប្រឹក្សា CNE បាននិយាយថា លោក Asfura បេក្ខជនអភិរក្សនិយមមកពីគណបក្សជាតិ (National Party) ដែលមានការគាំទ្រពីលោកប្រធានាធិបតីអាមេរិក Donald Trump ទទួលបានជ័យជម្នះក្នុងសំឡេងគាំទ្រ ៤០,៣% លើសលោក Salvador Nasralla បេក្ខជនស្តាំនិយមកណ្តាលមកពីគណបក្សសេរីនិយម ដែលទទួលបានសំឡេងគាំទ្រ ៣៩,៥%។

ក្នុងការបង្ហោះលើបណ្ដាញសង្គម X លោក Asfura បានថ្លែងទៅកាន់ប្រជាជនហុងឌុយរ៉ាសថា "លោកត្រៀមខ្លួនរួចរាល់ហើយដើម្បីគ្រប់គ្រង ហើយនឹងមិនធ្វើឱ្យប្រជាជនខកចិត្តឡើយ"។ រដ្ឋមន្ត្រីការបរទេសអាមេរិក លោក Marco Rubio បានជំរុញឱ្យគ្រប់ភាគីទាំងអស់គោរពលទ្ធផល "ដើម្បីឱ្យអាជ្ញាធរហុងឌុយរ៉ាស អាចធានាបាននូវការផ្ទេរអំណាចដោយសន្តិវិធី"។

លទ្ធផលផ្លូវការចុងក្រោយនេះ បានកើតឡើងបន្ទាប់ពីភាពចម្រូងចម្រាស និងចលាចលយ៉ាងវឹកវរអស់ជាច្រើនសប្ដាហ៍ជាមួយនឹងការតវ៉ានៅទូទាំងប្រទេស ក្រោយការបោះឆ្នោតដែលត្រូវបានធ្វើឡើងនៅថ្ងៃទី៣០ ខែវិច្ឆិកា និងការព្យារពេលរាប់សន្លឹកឆ្នោតជាច្រើនដង៕