ខណៈដែលរដូវត្រីធ្វើផ្អក ប្រហុក ត្រីឆ្អើរ បានចាប់ផ្តើមត្រូវច្រើនចាប់ពីថ្ងៃទី២៥ ខែធ្នូនេះទៅ ប្រជា​ពលរដ្ឋទាំងទីជិត និងទីឆ្ងាយ បាននាំគ្នាមកទិញ ដើម្បីធ្វើទុកហូបផង និងសម្រាប់​លក់​ផង​នៅ​ក្នុង​មូលដ្ឋានរបស់ខ្លួន។ សម្រាប់ឆ្នាំនេះ ប្រជាពលរដ្ឋដែល​តែង​តែនិ​យម​ទៅ​ទិញ​ត្រី​ដើម្បី​ធ្វើ​ប្រហុក​ទុកទ​ទួល​ទាននោះ បានលើកឡើងថា ត្រីប្រហុកឆ្នាំនេះមានភាពល្អប្រសើរជាងមុន ហើយ​ក៏​មាន​តម្លៃសមរម្យ។

កំពុង​រង់​ចាំកាត់ក្បាលត្រីដើម្បីយកទៅធ្វើប្រហុក អ្នកស្រី ង៉ែត វឿន មកពីស្រុកកំពង់សិលា ខេត្ត​ព្រះសីហនុ ​បាននិយាយប្រាប់ព័ត៌មាន ប៊ីធីវី ឱ្យដឹងថា មិនខុសពីឆ្នាំកន្លងៗទៅទេ អ្នកស្រីរួមទាំ​ងសាច់​ញាតិ​តែងតែមកទិញត្រីកាត់ធ្វើប្រហុក ដើម្បីទុកសម្រាប់ហូបផង និងដើម្បីលក់ផង។ អ្នកស្រី បានបន្តថា ឆ្នាំនេះដោយសារត្រីសម្បូរ ហើយតម្លៃល្អ អ្នកស្រីបានទិញត្រីចំនួន ៥០០ ​ទៅ​៦០០គីឡូ ដោយក្នុងមួយគីឡូថ្លៃជិត ១ពាន់រៀល ក្នុង១គីឡូ ទៅតាមទំហំត្រី។

ប្រជា​ពលរដ្ឋដែលមកពីតំបន់ផ្សេងៗគ្នា ក្នុងគោលដៅតែមួយដើម្បីទិញត្រីយកទៅធ្វើប្រហុក ផ្អក សម្រាប់​ទទួលទាន នៅតំបន់កំពុងលួង ស្រុកពញាឮ ខេត្តកណ្តាល ពួកគាត់បានលើកឡើងថា តម្លៃ​ត្រី​ឆ្នាំនេះ និងឆ្នាំមុន គឺប្រហាក់ប្រហែលគ្នា ចន្លោះពី ៣០០រៀល ទៅ៩០០រៀល ក្នុង​១​គីឡូ​ក្រាម​ ទៅតាមទំហំ និងប្រភេទត្រីខុសៗគ្នា។ ក្រុមប្រជាពលរដ្ឋ បានឱ្យដឹងស្រដៀងគ្នាទៀតថា ការ​មក​ទិញត្រីប្រហុក ផ្អកនេះ គឺមកក្នុងមួយឆ្នាំម្តង ដើម្បីទុកប្រើពេញមួយឆ្នាំបន្ទាប់។

លោក ហេង សុភារិទ្ធិ នាយខណ្ឌរដ្ឋបាលជលផលខេត្តកណ្តាល បាន​អំពាវ​នាវ​ឱ្យ​ប្រជា​ពលរដ្ឋ​ដែល​មាន​បំណងធ្វើប្រហុក ផ្អក ត្រីឆ្អើរ ឬទឹកត្រី រួសរាន់អញ្ជើញមកទិញត្រីតាមពេលវេលា និង​ទី​កន្លែង​គន្លង​ដាយត្រីតាមដងទន្លេសាប នៅក្នុងភូមិសាស្រ្តខេត្តកណ្តាល និងរាជធានីភ្នំពេញ ចាប់​ពី​ថ្ងៃ​ទី​២៥ ដល់ថ្ងៃទី៣១ ខែធ្នូ ឆ្នាំ២០២៥៕ អត្ថបទ៖ ឈិត បូរ៉ាវី