ប្រព័ន្ធផ្សព្វផ្សាយស៊ីរីនិងអ្នកឃ្លាំមើលសិទ្ធិមនុស្ស បានរាយការណ៍ថា ប្រទេសហ្ស៊កដានី បានបើកការវាយប្រហារតាមអាកាសជាបន្តបន្ទាប់នៅក្នុងខេត្ត Sweida ភាគខាងត្បូងប្រទេសស៊ីរីកាលពីយប់ថ្ងៃពុធ ដោយកំណត់គោលដៅទៅលើបណ្តាញរត់ពន្ធគ្រឿងញៀនដែលសង្ស័យ និងទីតាំងស្តុកនៅជិតព្រំដែន។

ទូរទស្សន៍ Ikhbariya គ្រប់គ្រងដោយរដ្ឋស៊ីរីបាននិយាយថា ការវាយឆ្មក់បានវាយប្រហារលើទីតាំងស្តុកគ្រឿងញៀន និងទីតាំងផ្ទុកអាវុធដែលត្រូវបានប្រើប្រាស់ដោយក្រុមជនអន្ធពាលរត់ពន្ធប្រដាប់អាវុធ។ អតីតប៉ុស្តិ៍យោធាជួរមុខស៊ីរីមួយកន្លែង ដែលកាលពីពេលថ្មីៗត្រូវបានយកមកប្រើប្រាស់ឡើងវិញសម្រាប់ស្តុកគ្រឿងញៀន ក៏ត្រូវបានបំផ្លាញផងដែរ។

នៅក្នុងសេចក្តីថ្លែងការណ៍ កងកម្លាំងប្រដាប់អាវុធរបស់ប្រទេសហ្ស៊កដានី បានបញ្ជាក់ថា ខ្លួនបាន បំផ្លាញអាវុធ និងអ្នករត់ពន្ធគ្រឿងញៀន នៅតាមបណ្តោយព្រំដែនភាគខាងជើងប្រទេសហ្ស៊កដានី និង បានកំណត់គោលដៅលើរោងចក្រ និងរោងជាងមួយចំនួនដែលប្រើប្រាស់ដោយក្រុមទាំងនេះជាកន្លែងលាក់ខ្លួនសម្រាប់ប្រតិបត្តិការរត់ពន្ធឆ្លងដែនឆ្ពោះទៅប្រទេសហ្ស៊កដានី។

ហ្ស៊កដានី បានបង្កើនប្រតិបត្តិការយោធាតាមបណ្តោយព្រំដែនភាគខាងជើងរបស់ខ្លួនក្នុងរយៈពេលប៉ុន្មានឆ្នាំថ្មីៗនេះ ដែលភាគច្រើនតាមរយៈយានដ្រូន ដោយលើកឡើងពីការគំរាមកំហែងកាន់តែខ្លាំងឡើងពីបណ្តាញជួញដូរគ្រឿងញៀន និងអាវុធ។