យោងតាមអាជ្ញាធរសហរដ្ឋអាមេរិកបានឲ្យដឹងថា មនុស្សពីរនាក់បានរងរបួសនៅក្នុងសង្កាត់មួយជាយទីក្រុង Baltimore បន្ទាប់ពីភ្នាក់ងារអនុវត្តច្បាប់អន្តោប្រវេសន៍និងគយ(ICE)សហរដ្ឋអាមេរិក បានបាញ់ទៅលើរថយន្តកំពុងធ្វើដំណើរ ដែលអ្នកបើកបរតាមការចោទប្រកាន់ថាកំពុងគេចវេសពីការចាប់ខ្លួន។

ក្រសួងសន្តិសុខមាតុភូមិ(DHS) និយាយថា ភ្នាក់ងារICE បានព្យាយាមចាប់ខ្លួនបុរសពីរនាក់មកពីប្រទេសព័រទុយហ្គាល់ និងអែលសាល់វ៉ាឌ័រ ជាអ្នកដែលតាមការចោទប្រកាន់ថាកំពុងរស់នៅក្នុងសហរដ្ឋអាមេរិកដោយខុសច្បាប់ ខណៈពួកគេកំពុងបើកបរឆ្លងកាត់តំបន់ Glen Burnie រដ្ឋ Maryland។

ក្រសួងសន្តិសុខមាតុភូមិ(DHS) បាននិយាយនៅក្នុងការបង្ហោះនៅលើបណ្តាញ X ថា មន្ត្រីបានខិតចូលទៅជិតរថយន្ត ហើយបានប្រាប់អ្នកបើកបរឱ្យពន្លត់ម៉ាស៊ីន ប៉ុន្តែអ្នកបើកបរមិនបានសហការទេ ហើយផ្ទុយទៅវិញបានបើកបុករថយន្តរបស់ទីភ្នាក់ងារ ICE ជាច្រើនគ្រឿង។

ក្រសួង បាននិយាយនៅក្នុងសេចក្តីថ្លែងការណ៍មួយនៅលើបណ្តាញ X ថា «ដោយខ្លាចប៉ះពាល់ដល់អាយុជីវិត និងសុវត្ថិភាពសាធារណៈ មន្ត្រី ICE បានបាញ់ដើម្បីការពារខ្លួន ដោយបានវាយប្រហារទៅលើអ្នកបើកបរ»។

ការសរសេរបង្ហោះរបស់ក្រសួងនិយាយថា «មន្ត្រីដ៏ក្លាហានរបស់យើងកំពុងប្រថុយជីវិតរបស់ពួកគេជារៀងរាល់ថ្ងៃ ដើម្បីរក្សាសុវត្ថិភាពសហគមន៍អាមេរិកដោយការចាប់ខ្លួន និងបណ្តេញជនបរទេសខុសច្បាប់ចេញពីដងផ្លូវ»។