អាជ្ញាធរបាននិយាយថា នគរបាលប្រទេសទួរគីនៅថ្ងៃព្រហស្បតិ៍នេះ បានឃុំខ្លួនសមាជិកក្រុមរដ្ឋអ៊ីស្លាមដែលសង្ស័យចំនួន១១៥នាក់ ក្នុងប្រតិបត្តិការប្រឆាំងភេរវកម្មទ្រង់ទ្រាយធំ ដោយត្រូវបានចោទប្រកាន់ថាមានផែនការវាយប្រហារនៅក្នុងប្រទេសនេះ។

ការិយាល័យរដ្ឋអាជ្ញាសាធារណៈទីក្រុងអ៊ីស្តង់ប៊ុល បាននិយាយថា ការចាប់ខ្លួននេះត្រូវបានធ្វើឡើងដោយផ្អែកលើព័ត៌មានស៊ើបការណ៍សម្ងាត់ថា ជនសង្ស័យបានផ្សព្វផ្សាយការអំពាវនាវឱ្យមានអំពើហិង្សា ទាក់ទងនឹងរដូវវិស្សមកាលបុណ្យណូអែលនិងបុណ្យចូលឆ្នាំសកលថ្មី ដោយដាក់គោលដៅរួមទាំងសមាជិកនៃសហគមន៍មិនមែនមូស្លីម ផងដែរ។

ការឆ្មក់បង្ក្រាបដែលបានសម្របសម្រួល ត្រូវបានធ្វើឡើងនៅទូទាំងសង្កាត់ជាច្រើននៃទីក្រុងអ៊ីស្តង់ប៊ុល ហើយនគរបាលបានរឹបអូសកាំភ្លើងខ្លី គ្រាប់រំសេវ និងឯកសារមួយចំនួន។ មន្ត្រី និយាយថា ប្រតិបត្តិការនេះគឺជាផ្នែកមួយនៃវិធានការសន្តិសុខកម្រិតខ្ពស់ក្នុងគោលបំណងទប់ស្កាត់ការរំខានក្នុងអំឡុងរដូវវិស្សមកាលនៅទីក្រុងអ៊ីស្តង់ប៊ុល ជាទីក្រុងដែលមានប្រជាជនប្រហែល ១៦ លាននាក់។

ប្រទេសទួរគីបានកំណត់ក្រុមអាយស៊ីស(IS) ជាផ្លូវការថាជាអង្គការភេរវកម្ម ក្នុងឆ្នាំ ២០១៣។