ប្រភពរដ្ឋាភិបាលជប៉ុន នៅថ្ងៃព្រហស្បតិ៍ (ទី២៥ ខែធ្នូ) នេះ បានបង្ហើបឲ្យដឹងថា សមាជិកនៃក្រុមប្រទេសមានឧស្សាហកម្មលូតលាស់ទាំង៧ (G7) និងប្រទេសដែលសម្បូរធនធានផ្សេងទៀត កំពុងរៀបចំកិច្ចប្រជុំរបស់ប្រមុខហិរញ្ញវត្ថុរបស់ពួកគេ នៅខែមករា ក្នុងទីក្រុងវ៉ាស៊ីនតោន សហរដ្ឋអាមេរិក ដើម្បីពិភាក្សាអំពីវិធីធានាឲ្យបាននូវធនធានរ៉ែសំខាន់ៗ ដើម្បីដោះស្រាយកង្វល់ ពាក់ព័ន្ធនឹងការពឹងផ្អែកលើចិន សម្រាប់ខ្សែច្រវាក់ផ្គត់ផ្គង់របស់ប្រទេសទាំងនោះ។

ប្រមុខហិរញ្ញវត្ថុ G7 រួមជាមួយនឹងមន្ត្រីមកពីអូស្ត្រាលី ឈីលី ឥណ្ឌា ម៉ិកស៊ិក និងកូរ៉េខាងត្បូង បានព្រមព្រៀងគ្នានៅក្នុងកិច្ចប្រជុំអនឡញ (តាមប្រព័ន្ធអ៊ីនធឺណិត) កាលពីដើមខែធ្នូ ក្នុងការ «កាត់បន្ថយភាពអាស្រ័យលើប្រភពតែមួយ» ដោយមិនបានបញ្ចេញពីឈ្មោះប្រទេសចិនឡើយ។

រ៉ែកម្រត្រូវបានចាត់ទុកថា ជារ៉ែដ៏សំខាន់ដែលមិនអាចខ្វះបាន សម្រាប់ការផលិតផលិតផលនាន ដូចជា ម៉ូទ័រ នៅក្នុងរថយន្តអគ្គិសនី និងបន្ទះឈីបជាដើម។

ប្រទេសចិនត្រូវបានគេប៉ាន់ប្រមាណថា នឹងផ្គត់ផ្គង់ច្រើនជាង ៦០ភាគរយនៃទិន្នផលរ៉ែកម្ររបស់ពិភពលោក និងក្ដោបក្ដាប់ជាង ៩០ភាគរយនៃសមត្ថភាពកែច្នៃ ដែលធ្វើឲ្យឧស្សាហកម្មសកលងាយរងគ្រោះ ដោយសារការប្រើប្រាស់ការគ្រប់គ្រងលើការនាំចេញរបស់ប្រទេសនេះ ជាឧបករណ៍ ដើម្បីមានឥទ្ធិពលផ្នែកភូមិសាស្ត្រនយោបាយ។

ប្រភពបានប្រាប់ឲ្យដឹងថា ដើម្បីទប់ទល់នឹងបញ្ហានោះ G7 កំពុងសម្លឹងមើលការកសាងក្របខ័ណ្ឌនៃកិច្ចសហប្រតិបត្តិការជាមួយប្រទេសដែលសម្បូរធនធាន ដូចជាអូស្ត្រាលី និងឈីលីជាដើម ដើម្បីទទួលបានស្ថិរភាពរ៉ែសំខាន់ៗ ដោយមិនពឹងផ្អែកលើចិន។ ប្រភពបានបញ្ជាក់បន្ថែមថា បញ្ហាដែលត្រូវពិភាក្សាដោយរដ្ឋមន្ត្រីហិរញ្ញវត្ថុនេះ ត្រូវបានគេរំពឹងថា នឹងរួមបញ្ចូលការបង្កើតច្បាប់អន្តរជាតិ សម្រាប់ការកែច្នៃរ៉ែកម្រផងដែរ៕