ប្រទេសអារ៉ាប៊ីសាអ៊ូឌីត នៅថ្ងៃព្រហស្បតិ៍ (ទី២៥ ខែធ្នូ) នេះ បានប្រាប់ឲ្យដឹងថា ខ្លួននៅតែមានក្តីសង្ឃឹមថា ក្រុមបំបែកខ្លួនដ៏សំខាន់នៅភាគខាងត្បូងនៃប្រទេសយេម៉ែន នឹងបញ្ចប់ការបង្កើនភាពតានតឹង ដែលបានជួយឲ្យខ្លួននូវការគ្រប់គ្រងយ៉ាងធំ នៅទូទាំងភាគខាងត្បូង ដោយធ្វើឲ្យមានភាពមិនច្បាស់លាស់កាន់តែខ្លាំងឡើងៗ នៅក្នុងប្រទេសមួយដែលបែងចែកទៅជារដ្ឋបាល ២រួចហើយ ចាប់តាំងពីសង្គ្រាមស៊ីវិលបានផ្ទុះឡើងជាង ១ទសវត្សរ៍មុន។

នៅក្នុងសេចក្តីថ្លែងការណ៍របស់ក្រសួងការបរទេស ព្រះរាជាណាចក្រមួយនេះ បានពិពណ៌នាអំពីប្រតិបត្តិការយោធារបស់ក្រុមប្រឹក្សាអន្តរកាលភាគខាងត្បូង (STC) របស់យេម៉ែន ដែលក្រុមនេះបានដណ្តើមកាន់កាប់ខេត្តភាគខាងកើត Hadramout និង Mahra នាដើមខែនេះថា ជា «ការបង្កើននូវភាពតានតឹងដោយមិនសមហេតុផល»។

សេចក្តីថ្លែងការណ៍បានបញ្ជាក់ថា៖ «ព្រះរាជាណាចក្រនេះ នៅតែសង្ឃឹមថា ផលប្រយោជន៍សាធារណៈនឹងទទួលបានជ័យជម្នះ តាមរយៈការបញ្ចប់នូវការបង្កើននូវភាពតានតឹង ដោយក្រុមប្រឹក្សាអន្តរកាលភាគខាងត្បូង និងការដកកងកម្លាំងរបស់ខ្លួនចេញពីខេត្តទាំង២ ជាបន្ទាន់ និងប្រកបដោយរបៀបរៀបរយ»។

កងកម្លាំង STC គាំទ្រដោយអារ៉ាប់រួម ដំបូងឡើយគឺជាផ្នែកមួយរបស់សម្ព័ន្ធភាពនៃបណ្ដាប្រទេសមូស្លីមនិកាយស៊ុននីដឹកនាំដោយអារ៉ាប៊ីសាអ៊ូឌីត ដែលបានធ្វើអន្តរាគមន៍ក្នុងប្រទេសយេម៉ែន ក្នុងឆ្នាំ២០១៥ ប្រឆាំងនឹងក្រុមហ៊ួទីដែលជាសម្ព័ន្ធមិត្តរបស់អ៊ីរ៉ង់។ ប៉ុន្តែក្រុម STC បានប្រែទៅជាប្រឆាំងជាមួយរដ្ឋាភិបាល ហើយស្វែងរកការគ្រប់គ្រងដោយខ្លួនឯង នៅភាគខាងត្បូង ក្នុងនោះរួមទាំងទីក្រុងកំពង់ផែដ៏ធំ គឺ Aden ផងដែរ ដែលរដ្ឋបាលគាំទ្រដោយអារ៉ាប៊ីសាអ៊ូឌីត មានទីស្នាក់ការកណ្តាល៕