កាសែតប្រចាំថ្ងៃអ៊ីរ៉ង់ដែលមានសម្ព័ន្ធភាពជាមួយកងឆ្មាំបដិវត្តន៍អ៊ីស្លាម បានសរសេរថា អ៊ីស្រាអែល ខ្វះសមត្ថភាពក្នុងការប្រយុទ្ធប្រឆាំងនឹងសង្គ្រាមដ៏យូរអង្វែងជាមួយអ៊ីរ៉ង់ ដោយនិយាយថាជម្លោះណាមួយដែលកើតឡើងវិញនឹងធំជាង និងយូរជាង ការប្រឈមដាក់គ្នារយៈពេល១២ ថ្ងៃកន្លងទៅ។

ការសែត Javan របស់អ៊ីរ៉ង់ខាងលើ បានសរសេរក្នុងអត្ថបទវិភាគមួយកាលពីថ្ងៃពុធសប្ដាហ៍នេះ ថា អ៊ីស្រាអែល មិនមានសមត្ថភាពសម្រាប់សង្គ្រាមដ៏ខ្លាំងក្លា ឬសម្រាប់ការប្រឈមនឹងមហាអំណាចដូចជាអ៊ីរ៉ង់ទេ ហើយវាច្បាស់ណាស់ថាសង្គ្រាមមួយផ្សេងទៀតនឹងមិនបញ្ចប់ក្នុងរយៈពេល១២ ថ្ងៃដូចសង្គ្រាមមុននោះទេ។

សង្គ្រាមរយៈពេល១២ ថ្ងៃរវាងអ៊ីរ៉ង់ និងអ៊ីស្រាអែល កាលពីខែមិថុនា ឆ្នាំ២០២៥ គឺជាជម្លោះរយៈពេលខ្លី ប៉ុន្តែខ្លាំងក្លា។ជម្លោះនោះបានចាប់ផ្តើមឡើងដោយការវាយប្រហារតាមអាកាសយ៉ាងទូលំទូលាយរបស់អ៊ីស្រាអែល លើមូលដ្ឋានយោធា និងនុយក្លេអ៊ែររបស់អ៊ីរ៉ង់។

សហរដ្ឋអាមេរិកបានចូលរួមផ្នែកយោធានៅពាក់កណ្តាលជម្លោះនោះ។ នៅថ្ងៃទី ២២ ខែមិថុនា កងកម្លាំងទ័ពអាកាស និងកងទ័ពជើងទឹកសហរដ្ឋអាមេរិកបានវាយប្រហារលើរោងចក្រនុយក្លេអ៊ែរអ៊ីរ៉ង់ចំនួនបីគឺ Natanz, Fordow និង Isfahan ក្នុងប្រតិបត្តិការមួយដែលដាក់ឈ្មោះថា Operation Midnight Hammer ដោយប្រើយន្តហោះទម្លាក់គ្រាប់បែក B-2 និងមីស៊ីលបាញ់ចេញពីនាវាមុជទឹក ដែលជាការវាយលុកលើកដំបូងរបស់សហរដ្ឋអាមេរិកប្រឆាំងនឹងទឹកដីអ៊ីរ៉ង់ក្នុងរយៈពេលជាច្រើនទសវត្សរ៍។ កងកម្លាំងអ៊ីរ៉ង់បានបាញ់មីស៊ីលទៅលើទ្រព្យសម្បត្តិរបស់សហរដ្ឋអាមេរិកក្នុងមូលដ្ឋានទ័ពអាកាស Al Udeid ក្នុងប្រទេសកាតា បន្ទាប់ពីការវាយប្រហារទាំងនោះ។

ជម្លោះនេះបានបញ្ចប់ដោយបទឈប់បាញ់ដែលសម្របសម្រួលដោយសហរដ្ឋអាមេរិក និងកាតា ប៉ុន្តែការប្រយុទ្ធគ្នាមួយរយៈនោះ បណ្តាលឱ្យមានអ្នកស្លាប់ និងរបួសយ៉ាងច្រើន និងការខូចខាតហេដ្ឋារចនាសម្ព័ន្ធទាំងនៅអ៊ីរ៉ង់ និងអ៊ីស្រាអែល៕