យោងតាមសេចក្ដីរាយការណ៍របស់ក្រុមអ្នកសារព័ត៌មាន Al Jazeera ដែលនៅក្នុងទីក្រុងហ្កាហ្សាផ្ទាល់ បានឱ្យដឹងថា សហគមន៍អ្នកកាន់គ្រិស្តសាសនានៅក្នុងតំបន់ហ្កាហ្សា បានប្រារព្ធពិធីបុណ្យណូអែលដ៏ស្ងប់ស្ងាត់មួយ ខណៈសំឡេងនៃការបាញ់ផ្លោង និងសំឡេងយានដ្រូនរបស់អ៊ីស្រាអែល ចេញពីភាគខាងកើតនៃតំបន់នោះ បានបន្លឺឡើងពេញមួយយប់រហូតដល់ព្រឹកព្រលឹមថ្ងៃទី២៥ ខែធ្នូ ដែលគួរតែជាថ្ងៃបុណ្យណូអែលដ៏រីករាយ។

របាយការណ៍បានបន្តថា ក្រៅពីភាពភ័យខ្លាចទាំងនេះ វិហារសាសនាគ្រិស្តជាច្រើនដែលនៅសេសសល់ទូទាំងតំបន់ហ្កាហ្សា បានកាត់បន្ថយ ឬលុបចោលសកម្មភាពបុណ្យណូអែលទាំងស្រុង ហើយជំនួសមកវិញដោយការជួបជុំតូចៗលក្ខណៈឯកជន និងការអធិស្ឋានតាមជញ្ជាំងព្រះវិហារដែលរងការខូចខាត។

ចំនួនភាគច្រើននៃប្រជាជន ២លាននាក់ របស់ហ្កាហ្សា ត្រូវបង្ខំឱ្យចាកចេញពីផ្ទះសម្បែង ក្នុងអំឡុងសង្គ្រាមដីគោកនិងផ្លូវអាកាសអស់ ២ឆ្នាំ របស់អ៊ីស្រាអែល ក្នុងតំបន់ដ៏តូចចង្អៀតនេះ ដែលបញ្ឆេះឡើងដោយការវាយប្រហារខែតុលា ឆ្នាំ២០២៣ របស់ក្រុមសកម្មប្រយុទ្ធហាម៉ាស។ បច្ចុប្បន្ន មនុស្សជាច្រើនរស់នៅក្នុងតង់ និងទីជម្រកបណ្ដោះអាសន្នផ្សេងទៀត ដោយសារលំនៅឋានត្រូវបំផ្លាញក្នុងសង្រ្គាម។

បទឈប់បាញ់ដែលចូលជាធរមានកាលពីខែតុលា កន្លងទៅ បានបន្តយ៉ាងទូលំទូលាយទោះបីជាមានការចោទដាក់គ្នា និងការវាយប្រហារមួយចំនួនក៏ដោយ។ ទោះយ៉ាងក្ដី សង្រ្គាមដ៏បង្ហូរឈាមបានបំផ្លាញផ្នែកភាគច្រើនរបសហ្កាហ្សារួចទៅហើយ រួមទាំងហេដ្ឋារចនាសម្ព័ន្ធជាមូលដ្ឋាន ដែលធ្វើឱ្យអ្នកស្រុកប្រឈមហានិភ័យខ្ពស់ក្នុងរដូវរងា៕