ទីភ្នាក់ងារសារព័ត៌មាន Yonhap បានរាយការណ៍នៅថ្ងៃសុក្រ (២៦ ធ្នូ) នេះថា រដ្ឋអាជ្ញាពិសេសកូរ៉េខាងត្បូង បានដាក់សំណើឱ្យកាត់ទោសលោកអតីតប្រធានាធិបតី Yoon Suk Yeol ឱ្យជាប់ពន្ធនាគាររយៈពេល ១០ឆ្នាំ ពីបទចោទជាច្រើនករណី រួមទាំងការរារាំងនូវការប៉ុនប៉ងចាប់ខ្លួនលោក ជុំវិញច្បាប់អាជ្ញាសឹកដ៏ចម្រូងចម្រាស។

ក្រុមរដ្ឋអាជ្ញាបានចោទអតីតប្រធានាធិបតីរូបនេះពីបទព្យាយាមរារាំងអ្នកស៊ើបអង្កេត ដែលប៉ុនប៉ងចាប់ខ្លួនលោកកាលពីខែមករា ដោយការបង្ខាំងខ្លួនឯងនៅខាងក្នុងបរិវេណវិមានប្រធានាធិបតី។ នេះគឺជាសំណើសម្រាប់ការជាប់ពន្ធនាគារលើកដំបូងហើយ ដែលរដ្ឋអាជ្ញាពិសេសបានធ្វើឡើង ជុំវិញបទចោទប្រកាន់ជាច្រើនដែលលោក Yoon កំពុងប្រឈម។

គួររម្លឹកថា លោក Yoon បានធ្វើឱ្យកូរ៉េខាងត្បូង ធ្លាក់ក្នុងវិបត្តិនយោបាយ ដោយការព្យាយាមប្រកាសច្បាប់អាជ្ញាសឹកក្នុងខែធ្នូ ឆ្នាំ២០២៤ និងបានបញ្ជូនទាហានប្រដាប់អាវុធទៅកាន់សភា ក្នុងគោលបំណងបញ្ឈប់សមាជិកសភា មិនឱ្យបោះឆ្នោតទម្លាក់សេចក្តីប្រកាសច្បាប់អាជ្ញាសឹករបស់លោក។

ក្រោយមក កិច្ចខិតខំប្រឹងប្រែងនេះបានបរាជ័យ ខណៈលោក Yoon ត្រូវបានឃុំខ្លួននៅដើមខែមករា ឆ្នាំ២០២៥នេះ ហើយលោកបានក្លាយជាប្រធានាធិបតីកំពុងកាន់តំណែងដំបូងគេរបស់កូរ៉េខាងត្បូង ដែលត្រូវបានចាប់ខ្លួន៕