រដ្ឋាភិបាលយេម៉ែនដែលទទួលស្គាល់ដោយអន្តរជាតិកាលពីថ្ងៃព្រហស្បតិ៍ បានគាំទ្រការអំពាវនាវរបស់   អារ៉ាប៊ីសាអ៊ូឌីត ដើម្បីបន្ធូរបន្ថយភាពតានតឹង នៅក្នុងតំបន់ភាគខាងត្បូងរបស់ប្រទេសនេះ ខណៈដែលចលនាយោធារបស់ក្រុមប្រឹក្សាអន្តរកាលភាគខាងត្បូង (STC) បន្តធ្វើឲ្យសម្ព័ន្ធភាពប្រឆាំងនឹងក្រុមហ៊ួទីកាន់តែតានតឹង។

នៅក្នុងសេចក្តីថ្លែងការណ៍មួយដែលធ្វើឡើងដោយទីភ្នាក់ងារសារព័ត៌មាន Saba ដែលគ្រប់គ្រងដោយរដ្ឋ រដ្ឋាភិបាលយេម៉ែនបានស្វាគមន៍អ្វីដែលខ្លួនពិពណ៌នាថា ជាជំហរដ៏ច្បាស់លាស់ មានតុល្យភាព និងមានការទទួលត្រូវរបស់អារ៉ាប៊ីសាអ៊ូឌីតចំពោះការវិវត្តចុងក្រោយបំផុត នៅក្នុងខេត្ត Hadramout និង Al-Mahrah។

រដ្ឋាភិបាលបានព្រមានថា សកម្មភាពសន្តិសុខ ឬយោធាណាមួយ ដែលធ្វើឡើងនៅខាងក្រៅអាជ្ញាធរ        រដ្ឋ និងដោយគ្មានការសម្របសម្រួលជាមួយក្រុមប្រឹក្សាភាពជាអ្នកដឹកនាំនៃប្រធានាធិបតី (PLC) រដ្ឋាភិ  បាល ឬអាជ្ញាធរមូលដ្ឋាន គឺជា«ប្រភពនៃភាពតានតឹងដែលមិនអាចទទួលយកបាន» និងដាក់បន្ទុកបន្ថែមលើប្រទេសដែលរងការបំផ្លិចបំផ្លាញដោយសង្គ្រាមនេះ។

ក្រសួងការបរទេសអារ៉ាប៊ីសាអ៊ូឌីត បាននិយាយកាលពីថ្ងៃព្រហស្បតិ៍ថា ការដាក់ពង្រាយកងទ័ពរបស់ STC នាពេលថ្មីៗនេះ នៅក្នុងខេត្តភាគខាងត្បូងយេម៉ែនចំនួនពីរ បានបង្កឲ្យកើនឡើងភាពតានតឹងដោយមិនសមហេតុផល» ដែលប៉ះពាល់ដល់ផលប្រយោជន៍យេម៉ែន និងធ្វើឲ្យមានភាពស្មុកស្មាញដល់កិច្ចខិតខំប្រឹងប្រែងរបស់សម្ព័ន្ធមិត្តដឹកនាំដោយអារ៉ាប៊ីសាអ៊ូឌីត។

ទីក្រុងរីយ៉ាដបានប្រកាសថា គណៈប្រតិភូយោធាចម្រុះអារ៉ាប៊ីសាអ៊ូឌីត-អារ៉ាប់រួម បានមកដល់ទីក្រុង Aden ដើម្បីសម្របសម្រួលជាមួយក្រុមប្រឹក្សាអន្តរកាលភាគខាងត្បូង (STC) អំពីការដកកងកម្លាំងរបស់ខ្លួនចេញពីតំបន់ទាំងនោះ តាមរបៀបរៀបរយ និងទាន់ពេលវេលា និងការផ្ទេរជំរំយោធាទៅឲ្យកងកម្លាំង  រដ្ឋាភិបាល ឬកងកម្លាំងមូលដ្ឋាន៕