ប្រទេសនីហ្សេរីយ៉ាបានឲ្យដឹងនៅថ្ងៃសុក្រ (ទី២៦ ខែធ្នូ) នេះថា ខ្លួនបានផ្តល់ឲ្យសហរដ្ឋអាមេរិកនូវព័ត៌មានស៊ើបការណ៍សម្ងាត់ ពាក់ព័ន្ធនឹងក្រុមជ្រុលនិយម មុនពេលមានការវាយប្រហារនៅថ្ងៃបុណ្យណូអែល ដោយកងកម្លាំងសហរដ្ឋអាមេរិក ប្រឆាំងនឹងអ្វីដែលប្រធានាធិបតី លោក Donald Trump បាននិយាយថា ជាពួកសកម្មប្រយុទ្ធរបស់ក្រុមរដ្ឋឥស្លាម ISIS នៅភាគពាយព្យនៃប្រទេសនេះ។

ការវាយប្រហាររបស់សហរដ្ឋអាមេរិក បានកើតឡើងបន្ទាប់ពីទីក្រុង Abuja និងវ៉ាស៊ីនតោន បានជាប់នៅក្នុងជម្លោះការទូត ជុំវិញអ្វីដែលលោក Trump កំណត់ថា ជាការសម្លាប់រង្គាលលើគ្រិស្តបរិស័ទ ស្របពេលផ្ទុះជម្លោះប្រដាប់អាវុធជាច្រើន នៅប្រទេសអាហ្វ្រិកខាងលិចមួយនេះ។

រដ្ឋមន្ត្រីការបរទេសនីហ្សេរីយ៉ា លោក Yusuf Tuggar បានប្រាប់ទូរទស្សន៍ ChannelsTV ថា «គឺជាប្រទេសនីហ្សេរីយ៉ា ដែលបានផ្តល់ព័ត៌មានស៊ើបការណ៍សម្ងាត់» ដោយលោកបានបញ្ជាក់ថា លោកបានជជែកតាមទូរសព្ទជាមួយរដ្ឋមន្ត្រីការបរទេសអាមេរិក លោក Marco Rubio។

លោក Tuggar បាននិយាយថា៖ «យើងបានជជែកគ្នា ២លើក។ យើងបាននិយាយគ្នារយៈពេល ១៩នាទីមុនពេលមានការវាយប្រហារនោះ ហើយបន្ទាប់មកយើងបាននិយាយម្តងទៀតរយៈពេល ៥នាទីទៀត មុនការវាយប្រហារបន្ត»។ លោកបានបន្ថែមថា ពួកលោកបានជជែកគ្នា «យ៉ាងទូលំទូលាយ» ហើយថា លោកប្រធានាធិបតី Bola Tinubu បានផ្តល់ «សញ្ញាយល់ព្រម» ដើម្បីឲ្យបើកការវាយប្រហារ។

ដោយមិនបានបង្ហាញព័ត៌មានលម្អិត លោកបាននិយាយទៀតថា ការវាយប្រហារនេះ នឹងជា «ដំណើរការបន្ត» ដែលនឹងមានការពាក់ព័ន្ធជាមួយប្រទេសផ្សេងទៀតផងដែរ។ លោកបានសង្កត់ធ្ងន់ថា វិធីសាស្រ្តរបស់នីហ្សេរីយ៉ា ក្នុងការប្រយុទ្ធប្រឆាំងនឹងអំពើភេរវកម្ម មិនត្រូវបានជះឥទ្ធិពលដោយសាសនារបស់ជនរងគ្រោះឡើយ «មិនថា ពួកគេជាមូស្លីម ឬគ្រិស្តបរិស័ទ ហើយមិនថា ប្រភេទភេរវកម្មបែបណានោះឡើយ»៕