ប្រធានាធិបតីអ៊ុយក្រែន លោក Volodymyr Zelenskiy បាននិយាយនៅថ្ងៃសុក្រ (ទី២៦ ខែធ្នូ) នេះថា លោកគ្រោងនឹងជួបជាមួយប្រធានាធិបតីអាមេរិក លោក Donald Trump ក្នុងពេលឆាប់ៗនេះ ហើយថា ការសម្រេចជាច្រើនអាចត្រូវបានធ្វើឡើងមុនចូលឆ្នាំ ខណៈដែលទីក្រុងវ៉ាស៊ីនតោន ជំរុញកិច្ចខិតខំប្រឹងប្រែងការទូត ដើម្បីបញ្ចប់សង្រ្គាមជាមួយរុស្ស៊ី។

លោក Zelenskiy បាននិយាយថា បញ្ហារសើបនានា រួមទាំងការសម្របសម្រួលណាមួយ អំពីដែនដី គួរតែត្រូវបានពិភាក្សានៅកម្រិតប្រមុខរដ្ឋ ហើយទីក្រុងគីវបាននិងកំពុងស្វែងរកការជួបដោយផ្ទាល់ជាមួយលោក Trump។

តាមរយៈបណ្ដាញសង្គម X បន្ទាប់ពីមាននូវកិច្ចចរចាជុំចុងក្រោយ រវាងអ្នកចរចាអ៊ុយក្រែន និងសហរដ្ឋអាមេរិក លោក Zelenskiy បានលើកឡើងថា៖ «យើងបានយល់ព្រមឲ្យមានកិច្ចប្រជុំកម្រិតខ្ពស់បំផុត ពោលគឺជាមួយលោកប្រធានាធិបតី Trump នាពេលអនាគតដ៏ខ្លីខាងមុខ។ អ្វីៗជាច្រើនអាចត្រូវបានសម្រេច មុនពេលចូលឆ្នាំថ្មី»។

លោកបានពិភាក្សាកាលពីថ្ងៃព្រហស្បតិ៍ជាមួយបេសកជនពិសេសរបស់លោក Trump គឺលោក Steve Witkoff និងលោក Jared Kushner ដែលជាកូនប្រសាររបស់លោកប្រធានាធិបតី។ លោកបានសង្កត់ធ្ងន់ថា ឯកសារមួយចំនួន ជាផ្នែកនៃក្របខណ្ឌដ៏ធំទូលាយដែលមានបំណងបញ្ចប់ជម្លោះ និងធានានូវការកសាងឡើងវិញរបស់អ៊ុយក្រែន «ជិតរួចរាល់ហើយ» ខណៈដែលឯកសារផ្សេងទៀត «ត្រូវបានរៀបចំយ៉ាងពេញលេញ»។

កាលពីដើមសប្តាហ៍នេះ មេដឹកនាំអ៊ុយក្រែនបានបង្ហាញសេចក្តីព្រាងផែនការសន្តិភាពចំនួន ២០ចំណុច ដែលលោកបានពិពណ៌នាថា ជាក្របខ័ណ្ឌដ៏សំខាន់ ដើម្បីបញ្ចប់សង្រ្គាម។ តែយ៉ាងណាក្ដី បើទោះបីជាផែនការនេះបានគូសបញ្ជាក់ថា អ៊ុយក្រែនទទួលបានការធានាសន្តិសុខ ដើម្បីការពារការឈ្លានពានរបស់រុស្ស៊ីបន្ថែមទៀតក៏ដោយ ក៏មិនឃើញមានការសម្របសម្រួល រវាងអ៊ុយក្រែន និងសហរដ្ឋអាមេរិក ជុំវិញបញ្ហាដែនដី ដែលទីក្រុងមូស្គូកំពុងទាមទារឲ្យទីក្រុងគីវព្រមលះបង់ឲ្យខ្លួននោះឡើយ៕