មេដឹកនាំប្រទេសកូរ៉េខាងជើង លោក Kim Jong Un បាននិយាយថា ទំនាក់ទំនងរបស់ប្រទេសលោកជាមួយរុស្ស៊ី ត្រូវបានពង្រឹងតាមរយៈការ «ចែករំលែកឈាម ជីវិត និងសេចក្តីស្លាប់ ក្នុងលេណដ្ឋានតែមួយ» ក្នុងសង្គ្រាមនៅអ៊ុយក្រែន ខណៈលោកបានផ្ញើសារស្វាគមន៍ឆ្នាំថ្មីទៅកាន់ប្រធានាធិបតីរុស្ស៊ី លោក Vladimir Putin ។

សាររបស់លោក Kim បានធ្វើឡើងបន្ទាប់ពីការផ្ញើសារស្វាគមន៍ឆ្នាំថ្មីរបស់លោកប្រធានាធិបតី Putin ទៅកាន់មេដឹកនាំកូរ៉េខាងជើង កាលពីថ្ងៃទី១៨ ខែធ្នូ ដែលបានសរសើរតួនាទី «វីរភាព» កងទ័ពរបស់ទីក្រុងព្យុងយ៉ាងមាននៅក្នុងតំបន់ Kursk ភាគខាងលិចរបស់ប្រទេសរុស្ស៊ី និង«បានបង្ហាញយ៉ាងច្បាស់ពីមិត្តភាពដ៏រឹងមាំ» រវាងប្រទេសទាំងពីរ នេះបើយោងតាមប្រព័ន្ធផ្សព្វផ្សាយរដ្ឋ។

នៅក្នុងសាររបស់លោកទៅកាន់លោក Putin ដែលបានចេញផ្សាយដោយទីភ្នាក់ងារសារព័ត៌មានកណ្តាលកូរ៉េ (KCNA) គ្រប់គ្រងដោយរដ្ឋ នៅថ្ងៃសៅរ៍នេះ លោក Kim បាននិយាយថា ឆ្នាំ២០២៥ គឺជា «ឆ្នាំដ៏មានអត្ថន័យពិតប្រាកដ» សម្រាប់ទំនាក់ទំនងទ្វេភាគី និងបានចាត់ទុកទំនាក់ទំនងរវាងទីក្រុងមូស្គូ និងទីក្រុងព្យុងយ៉ាងថាជា «ទ្រព្យសម្បត្តិរួមដ៏មានតម្លៃ ដែលត្រូវបន្តទៅមុខជារៀងរហូត មិនត្រឹមតែនៅក្នុងសម័យកាលបច្ចុប្បន្នប៉ុណ្ណោះទេ ប៉ុន្តែថែមទាំងដល់មនុស្សជំនាន់ក្រោយៗទៀត»។ ទីភ្នាក់ងារស៊ើបការណ៍សម្ងាត់កូរ៉េខាងត្បូង និងប្រទេសលោកខាងលិច និយាយថា កូរ៉េខាងជើងបានដាក់ពង្រាយកងទ័ពរាប់ពាន់នាក់ដើម្បីគាំទ្រដល់ទីក្រុងមូស្គូក្នុងសង្គ្រាមប្រឆាំងអ៊ុយក្រែន។ កូរ៉េខាងជើង បានបញ្ជាក់ជាផ្លូវការកាលពីខែមេសាថា ខ្លួនបានដាក់ពង្រាយកងទ័ពដើម្បីគាំទ្រយុទ្ធនាការយោធារបស់រុស្ស៊ីប្រឆាំងអ៊ុយក្រែន ហើយទាហានជាច្រើនរបស់ខ្លួនត្រូវបានសម្លាប់នៅក្នុងសមរភូមិនោះ។