នគរបាលបានប្រាប់ឲ្យដឹងថា នៅលើផ្លូវល្បឿនលឿនមួយខ្សែ ក្នុងខេត្ត Gunma នៅភាគពាយព្យនៃទីក្រុងតូក្យូរបស់ប្រទេសជប៉ុន ការមានឧបទ្ទវហេតុដ៏ធំដែលពាក់ព័ន្ធនឹងរថយន្តជាង ៥០គ្រឿង កាលពីថ្ងៃសុក្រ (ទី២៦ ខែធ្នូ) បានបណ្តាលឲ្យមនុស្សម្នាក់ស្លាប់ និងយ៉ាងតិច ២៦នាក់ផ្សេងទៀតរងរបួស ក្នុងនោះ ៥នាក់ស្ថិតក្នុងស្ថានភាពធ្ងន់ធ្ងរ។

យោងតាមនគរបាលបានឲ្យដឹងថា ហេតុការណ៍បុកតគ្នានេះ បានកើតឡើងនៅចំណុចចេញក្រៅក្រុង នៅផ្លូវល្បឿនលឿន Kan-etsu Expressway ក្នុងទីក្រុង Minakami នៅវេលាម៉ោងប្រហែល ៧:៣០នាទីយប់ (ម៉ោងក្នុងស្រុក) បន្ទាប់ពីរថយន្តជាច្រើនគ្រឿងទំនងជារអិលទឹកកក ដោយសារមានព្រិលធ្លាក់។ យ៉ាងហោចណាស់រថយន្ត ១០គ្រឿង ត្រូវបានឆាបឆេះ ដែលត្រូវប្រើពេលដល់ទៅជាង ៧ម៉ោង ដើម្បីពន្លត់។

គ្រោះថ្នាក់នេះ ផ្តើមចេញពីរថយន្តកុងតឺន័រ បានបើកទៅបុករថយន្ត ១គ្រឿងទៀត ដែលឈប់នៅលើផ្លូវនោះ បន្ទាប់ពីមានឧបទ្ទហេតុជាមួយរថយន្តតែ ១គ្រឿង ដោយបណ្តាលឲ្យមានការបុកតគ្នាចម្ងាយរហូតជាង ៣០០ម៉ែត្រ។ ស្ត្រីវ័យ ៧៧ឆ្នាំម្នាក់ មកពីទីក្រុងតូក្យូ នៅកៅអីខាងក្រោយរបស់រថយន្តនោះ បានបាត់បង់ជីវិត ចំណែកមនុស្ស ២១នាក់ទៀត បានរងរបួសស្រាល។

ផ្នែកនៃផ្លូវល្បឿនលឿននេះ ត្រូវបានបិទបន្ទាប់ពីនោះ ដោយមានរថយន្តរងការខូចខាតយ៉ាងដំណំបន្តគ្នា ដែលខ្លះឆេះខ្ទេចស្ទើរតែមើលលែងយល់ និងធ្វើឲ្យចំណុចចេញក្រៅក្រុងកកស្ទះ៕