ប្រធានាធិបតីអាមេរិក លោក Donald Trump កាលពីថ្ងៃសុក្រ (ទី២៦ ខែធ្នូ) បានពណ៌នាការវាយប្រហារកាលពីល្ងាចថ្ងៃព្រហស្បតិ៍លើគោលដៅដែលត្រូវបានសង្ស័យជាក្រុមរដ្ឋឥស្លាម ISIS (Daesh) នៅប្រទេសនីហ្សេរីយ៉ាថា ជាការផ្ដល់ «ការដូ (អំណោយ) បុណ្យណូអែល» ដល់ក្រុមភេរវករ។

លោក Trump បានអះអាងនៅក្នុងបទសម្ភាសន៍ជាមួយវិទ្យុ WABC ថា «គ្រិស្តបរិស័ទរាប់ម៉ឺននាក់» កំពុងត្រូវបានសម្លាប់ នៅនីហ្សេរីយ៉ា ដោយបានបន្ថែមថា លោកបានព្រមានរដ្ឋាភិបាលនីហ្សេរីយ៉ា អំពីផលវិបាកនានា។ អាជ្ញាធរនៅក្នុងប្រទេសអាហ្រ្វិកខាងលិច បានបដិសេធការលើកឡើងបែបនេះ ដោយអះអាងថា ការវាយប្រហារដែលកើតមាន ត្រូវបានជំរុញដោយហេតុផលឧក្រិដ្ឋកម្ម ជម្លោះដីធ្លី និងការដណ្ដើមធនធាន ជាជាងពាក់ព័ន្ធនឹងជំនឿសាសនា។

អមដោយការបន្ថែមថា កងកម្លាំងអាមេរិក បានវាយប្រហារក្រុម ISIS យ៉ាងខ្លាំងក្លា នៅទីតាំងផ្សេងៗជាច្រើន លោក Trump បានប្រាប់ថា៖ «ខ្ញុំបាននិយាយកាលពីម្សិលមិញថា វាយប្រហារពួកគេ នៅថ្ងៃបុណ្យណូអែល។ វានឹងក្លាយជាអំណោយបុណ្យណូអែល»។

នៅក្នុងបទសម្ភាសន៍មួយដាច់ដោយឡែក ជាមួយសារព័ត៌មាន Politico លោក Trump បានឲ្យដឹងថា ការវាយប្រហារដំបូង ត្រូវបានគ្រោងទុកធ្វើនៅថ្ងៃពុធ ប៉ុន្តែថា លោកបានពន្យារពេលទៅថ្ងៃបុណ្យណូអែល ដោយសារតែលោកចង់ឲ្យវាជាប្រតិបត្តិការដ៏មានអត្ថន័យជា «និមិត្តរូប»។

នីហ្សេរីយ៉ា បានបញ្ជាក់កាលពីព្រឹកថ្ងៃសុក្រថា ខ្លួនបន្តសហការជាមួយសហរដ្ឋអាមេរិក ជុំវិញបញ្ហាសន្តិសុខ ដើម្បីដោះស្រាយការគំរាមកំហែងពីអំពើភេរវកម្ម និងអំពើជ្រុលនិយមដែលកំពុងបន្តកើតមាន៕