ទីភ្នាក់ងារសារព័ត៌មានរដ្ឋអារ៉ាប៊ីសាអ៊ូឌីត បានរាយការណ៍នៅថ្ងៃសៅរ៍ (ទី២៧ ខែធ្នូ) នេះថា សម្ព័ន្ធភាពដឹកនាំដោយអារ៉ាប៊ីសាអ៊ូឌីតរបស់ប្រទេសយេម៉ែន បានឲ្យដឹងថា ការមានវិធានការយោធាណាមួយ នៅក្នុងខេត្ត Hadramout ភាគខាងកើត ដោយក្រុមបំបែកខ្លួនដ៏ធំ នៅភាគខាងត្បូងប្រទេស គឺ STC (ក្រុមប្រឹក្សាអន្តរកាលភាគខាងត្បូង) ដែលធ្វើឲ្យប៉ះពាល់ដល់កិច្ចប្រឹងប្រែងកាត់បន្ថយភាពតានតឹង នឹងត្រូវបានប្រឆាំងតបត ដើម្បីការពារជនស៊ីវិល។

សេចក្តីថ្លែងការណ៍ពីអ្នកនាំពាក្យក្រុមចម្រុះនេះ គឺលោកឧត្តមសេនីយ៍ Turki al-Malki បានកើតឡើងតាមសំណើរបស់លោក Rashad al-Alimi ដែលជាប្រមុខនៃក្រុមប្រឹក្សាថ្នាក់ដឹកនាំប្រធានាធិបតីនៃប្រទេសយេម៉ែន ដើម្បីឲ្យសម្ព័ន្ធនេះចាត់វិធានការជាបន្ទាន់ការពារជនស៊ីវិលនៅខេត្ត Hadramout ពី «ការរំលោភបំពានដែលប្រព្រឹត្តដោយក្រុមប្រដាប់អាវុធមានទំនាក់ទំនងជាមួយក្រុម STC»។

ក្រុមប្រឹក្សាអន្តរកាលភាគខាងត្បូង (STC) គាំទ្រដោយអារ៉ាប់រួមមួយនេះ បានបណ្តេញរដ្ឋាភិបាលដែលគាំទ្រដោយអារ៉ាប៊ីសាអូឌីត និងទទួលស្គាល់ជាអន្តរជាតិ ចេញពីទីស្នាក់ការកណ្តាលរបស់ខ្លួន នៅទីក្រុង Aden ហើយបានអះអាងសិទ្ធិគ្រប់គ្រងយ៉ាងទូលំទូលាយ នៅទូទាំងភាគខាងត្បូង ក្នុងខែនេះ។

ហើយកាលពីថ្ងៃសុក្រ ក្រុម STC នេះ បានច្រានចោលការអំពាវនាវរបស់អារ៉ាប៊ីសាអ៊ូឌីតឲ្យដកចេញពីតំបន់ ដែលខ្លួនដណ្តើមកាន់កាប់ កាលពីដើមខែធ្នូ ដោយបញ្ជាក់ថា ខ្លួននឹងបន្តគ្រប់គ្រងខេត្តភាគខាងកើត Hadramout និង Mahra៕