មីយ៉ាន់ម៉ាបោះឆ្នោតនៅក្នុងការបោះឆ្នោតមួយដែលត្រូវបានគេរិះគន់ថា ជាការបោះឆ្នោតក្លែងក្លាយប៉ុណ្ណោះ ក្នុងនោះគណបក្សនយោបាយធំៗ ត្រូវបានរំលាយចោល ភាគច្រើននៃមេដឹកនាំរបស់ពួកគេ ត្រូវបានដាក់ពន្ធនាគារ ហើយប្រហែលជាពាក់កណ្តាលនៃពលរដ្ឋនៅក្នុងប្រទេសមួយនេះ ទំនងជាមិនអាចបោះឆ្នោតបានឡើយ ដោយសារសង្រ្គាមស៊ីវិលកំពុងបន្ត ។

រដ្ឋាភិបាលយោធា រៀបចំការបោះឆ្នោតតាមដំណាក់កាលនៅថ្ងៃអាទិត្យទី ២៨ ខែធ្នូរនេះ រយៈពេលជិត ៥ឆ្នាំ ក្រោយពួកគេរឹបអូសអំណាចនៅក្នុងរដ្ឋប្រហារ ដែលបង្កឲ្យកើតមានក្រុមប្រឆាំងច្រើន និងធ្វើឲ្យមីយ៉ាន់ម៉ា ធ្លាក់ទៅក្នុងសង្រ្គាមស៊ីវិល ។

ក្រុមសង្កេតការណ៍និយាយថា របបសឹកដោយមានការគាំទ្រពីចិន កំពុងស្វែងរកភាពស្របច្បាប់ និងពង្រឹងអំណាចរបស់ខ្លួន ខណៈព្យាយាមស្វែងរកច្រកចេញពីភាពជាប់គាំងនយោបាយដ៏បំផ្លិចបំផ្លាញនេះ ។

ស្ថិតក្នុងចំណោមប្រទេសក្រីក្របំផុតរួចទៅហើយ នៅតំបន់អាស៊ីអាគ្នេយ៍ មីយ៉ាន់ម៉ាត្រូវបានរងគ្រោះយ៉ាងធ្ងន់ធ្ងរដោយសារជម្លោះបង្កឡើងដោយរដ្ឋប្រហារឆ្នាំ២០២១ ជាពេលដែលយោធាបានទម្លាក់រដ្ឋាភិបាលស៊ីវិលជាប់ឆ្នោតដឹកនាំដោយមា្ចស់ជ័យលាភីពានរង្វាន់ណូបែលសន្តិភាព លោកស្រី Aung San Suu Kyi ។ 

វិបត្តិមនុស្សធម៌នៅមីយ៉ាន់ម៉ា គឺជាវិបត្តិដ៏ធ្ងន់ធ្ងរជាងគេបំផុតមួយ នៅទ្វីបអាស៊ីបង្កឡើងដោយសង្គ្រាមស៊ីវិលកាន់តែខ្លាំងក្លា និងគ្រោះមហន្តរាយធម្មជាតិម្តងហើយម្តងទៀត ក្នុងនោះរួមទាំងរញ្ជួយដីដ៏ធំ កាលពីខែមីនាផងដែរ ។

អង្គការសហប្រជាជាតិ (UN) បានប៉ាន់ប្រមាណថា មនុស្ស ២០លាននាក់នៃប្រជាជន ៥១លាននាក់របស់មីយ៉ាន់ម៉ា ត្រូវការជំនួយ ខណៈដែលអតិផរណាកើនឡើង ហើយតម្លៃរូបិយប័ណ្ណធ្លាក់ចុះ បានធ្វើឲ្យប្រជាជនប្រហែលពាក់កណ្តាលធ្លាក់ចូលនៅក្រោមបន្ទាត់ភាពក្រីក្រ ។ 

យោងតាមការប៉ាន់ស្មានរបស់ UN បានឲ្យដឹងថា មនុស្សជាង ៣,៦លាននាក់ ត្រូវបានរត់ភៀសចេញពីផ្ទះសម្បែងរបស់ពួកគេ ក្នុងនោះជនស៊ីវិលជាង ៦.៨០០នាក់ ត្រូវបានសម្លាប់នៅក្នុងជម្លោះដែលបង្កឡើងដោយរដ្ឋប្រហារនេះ ៕