យោងតាមការិយាល័យប្រព័ន្ធផ្សព្វផ្សាយរបស់ខេត្តបានឲ្យដឹងថា មនុស្សបីនាក់បានស្លាប់កាលពីថ្ងៃអាទិត្យ ទី ២៨ ខែធ្នូ នៅពេលដែលការតវ៉ារបស់ក្រុមជនជាតិភាគតិច Alawite នៅចំណុចកណ្តាលក្រុង Latakia ប្រទេសស៊ីរី បានប្រែក្លាយទៅជាការបាញ់ប្រហារ និងអំពើហិង្សាផ្សេងៗទៀត។

ប្រទេសស៊ីរី បានរង្គោះរង្គើដោយការបង្ហូរឈាមខាងនិកាយ ចាប់តាំងពីមេដឹកនាំយូរអង្វែង លោក Bashar al-Assad ដែលមកពីជនជាតិភាគតិច Alawite មូស្លីម ត្រូវបានបណ្តេញចេញដោយការវាយលុករបស់ក្រុមឧទ្ទាមកាលពីឆ្នាំមុន ហើយត្រូវបានជំនួសដោយរដ្ឋាភិបាលដឹកនាំដោយនិកាយស៊ុននី។

ក្រុមអ្នកតវ៉ាជនជាតិភាគតិច Alawite រាប់ពាន់នាក់បានមកប្រមូលផ្តុំគ្នាកាលពីថ្ងៃអាទិត្យនៅទីលាន Azhari ក្នុងក្រុង Latakia ដើម្បីទាមទារប្រព័ន្ធនយោបាយវិមជ្ឈការនៅក្នុងប្រទេសស៊ីរី និងការដោះលែងអ្នកទោសជនជាតិភាគតិច Alawite រាប់ពាន់នាក់។ រយៈពេលប្រហែលពីរម៉ោងនៃការតវ៉ា សំឡេងកាំភ្លើងបានលាន់ឮ នេះបើយោងតាមអ្នកសារព័ត៌មាន Reuters នៅកន្លែងកើតហេតុ។ ក្រោយមកកងកម្លាំងសន្តិសុខបានបាញ់កាំភ្លើងទៅលើអាកាស ហើយការតវ៉ាបានធ្លាក់ចូលទៅជាភាពវឹកវរ ដោយក្រុមអ្នកតវ៉ាបានសែងអ្នករងរបួសច្រើននាក់ចេញដោយថ្មើរជើង។

សេចក្តីថ្លែងការណ៍ពីការិយាល័យប្រព័ន្ធផ្សព្វផ្សាយរបស់ខេត្ត Latakia ដែលត្រូវបានចែករំលែកទៅដល់អ្នកសារព័ត៌មានបាននិយាយថា មនុស្សបីនាក់ត្រូវបានសម្លាប់ និងមនុស្សជាង៤០នាក់បានរងរបួស។