ក្រោមស្រមោលនៃសង្គ្រាមស៊ីវិល និងសំណួរអំពីភាពជឿជាក់នៃការបោះឆ្នោត ជុំដំបូងនៃការបោះឆ្នោតសកលតាមដំណាក់កាលរបស់សហភាពមីយ៉ាន់ម៉ាបានបិទបញ្ចប់កាលពីថ្ងៃអាទិត្យ ២៨ ធ្នូ ដោយមានសញ្ញានៃចំនួនអ្នកចេញទៅបោះឆ្នោតទាបសម្រាប់ការបោះឆ្នោតលើកដំបូងចាប់តាំងពីរដ្ឋប្រហារយោធាក្នុងឆ្នាំ ២០២១។

របបសឹក ដែលបានបង្ក្រាបការតវ៉ាគាំទ្រលទ្ធិប្រជាធិបតេយ្យបន្ទាប់ពីរដ្ឋប្រហារ និងបង្កឱ្យមានការបះបោរទូទាំងប្រទេស បាននិយាយថា ការបោះឆ្នោតបីដំណាក់កាលនឹងនាំមកនូវស្ថិរភាពនយោបាយដល់ប្រទេសអាស៊ីអាគ្នេយ៍ដ៏ក្រីក្រនេះ ទោះបីជាមានការថ្កោលទោសពីអន្តរជាតិចំពោះការអនុវត្តនេះក៏ដោយ។

អង្គការសហប្រជាជាតិ ប្រទេសលោកខាងលិចមួយចំនួន និងក្រុមសិទ្ធិមនុស្សបាននិយាយថា ការបោះឆ្នោតនេះមិនសេរី យុត្តិធម៌ ឬគួរឱ្យទុកចិត្តបានទេ ដោយសារតែគណបក្សនយោបាយប្រឆាំងរបបយោធាមិនបានចូលរួម ហើយវាខុសច្បាប់ក្នុងការរិះគន់ការបោះឆ្នោត។

លោកស្រី អ៊ុងសាន ស៊ូជី (Aung San Suu Kyi )អ្នកឈ្នះរង្វាន់ណូបែលសន្តិភាព ដែលត្រូវបានទម្លាក់ដោយយោធាជាច្រើនខែបន្ទាប់ពីគណបក្សសម្ព័ន្ធជាតិដើម្បីប្រជាធិបតេយ្យរបស់លោកស្រីបានឈ្នះការបោះឆ្នោតសកលចុងក្រោយទទួលបានសំឡេងដ៏ច្រើនលើសលប់ក្នុងឆ្នាំ ២០២០ នៅតែជាប់ឃុំឃាំង ហើយគណបក្សដែលលោកស្រីដឹកនាំដើម្បីកាន់អំណាចត្រូវបានរំលាយ។

ប្រជាពលរដ្ឋនៅតាមទីក្រុងជាច្រើនរបស់សហភាពមីយ៉ាន់ម៉ា បាននិយាយថា ចំនួនពលរដ្ឋចេញទៅបោះឆ្នោតកាលពីថ្ងៃអាទិត្យចុងសប្ដាហ៍នេះ ទំនងជាទាបខ្លាំងជាងការបោះឆ្នោតកាលពី ឆ្នាំ២០២០ទៅទៀត៕