ក្រសួងការពារជាតិរុស្ស៊ី បាននិយាយកាលពីថ្ងៃអាទិត្យថាកងកម្លាំងរបស់ខ្លួនដណ្តើមយកបានទីតាំងលំនៅឋានចំនួន៦កន្លែងបន្ថែមទៀតនៅក្នុងតំបន់ Donetsk និង Zaporizhzhia ខណៈអ៊ុយក្រែនបានអះអាងនៅថ្ងៃដដែលនោះថា កងកម្លាំងរបស់ខ្លួនបានវាយប្រហាររោងចក្រចម្រាញ់ប្រេងរបស់រុស្ស៊ី។

នៅក្នុងរបាយការណ៍ចុងក្រោយរបស់ខ្លួន ក្រសួងបាននិយាយថា ក្នុងរយៈពេល២៤ម៉ោងកន្លងទៅនេះ កងកម្លាំងរុស្ស៊ីបានគ្រប់គ្រងទីតាំងលំនៅឋានចំនួន៤កន្លែងនៅក្នុងតំបន់ Donetsk និងពីរកន្លែងនៅក្នុងតំបន់ Zaporizhzhia។ របាយការណ៍បាននិយាយបន្ថែមថា កងកម្លាំងរុស្ស៊ីបានវាយប្រហារលើរោងចក្រថាមពលដែលបម្រើដល់សហគ្រាសឧស្សាហកម្មយោធាអ៊ុយក្រែន ហើយប្រព័ន្ធការពារដែនអាកាសរបស់ប្រទេសនេះបានបាញ់ទម្លាក់យានដ្រូនអ៊ុយក្រែនចំនួន ៣៧០ គ្រឿង។

នាយសេនាធិការនៃកងកម្លាំងប្រដាប់អាវុធអ៊ុយក្រែន បាននិយាយនៅក្នុងរបាយការណ៍មួយដែលចេញផ្សាយកាលពីថ្ងៃអាទិត្យថា ក្នុងរយៈពេល២៤ម៉ោងកន្លងទៅនេះ កងកម្លាំងអ៊ុយក្រែន បានធ្វើការវាយប្រហារលើគោលដៅរបស់រុស្ស៊ី រួមទាំងតំបន់ប្រមូលផ្តុំ និងប៉ុស្តិ៍ទីបញ្ជាការ ហើយកងទ័ពអ៊ុយក្រែនបានវាយរុញច្រានការវាយលុករបស់រុស្ស៊ីនៅទិសដៅតំបន់ Slobozhansk, Kupyansk និងតំបន់ Liman។

កងកម្លាំងអ៊ុយក្រែន ក៏បាននិយាយផងដែរថា ពួកគេបានបើកការវាយប្រហារលើរោងចក្រចម្រាញ់ប្រេង Syzran នៅក្នុងតំបន់ Samara របស់រុស្ស៊ី ដែលបានបង្កឱ្យមានអគ្គិភ័យ។