រដ្ឋអាជ្ញាអ៊ីតាលី បាននិយាយកាលពីថ្ងៃសៅរ៍ថា ពួកគេបានចាប់ខ្លួនមនុស្ស ៩នាក់ ជុំវិញការសង្ស័យថា បានផ្តល់ហិរញ្ញប្បទានដល់ក្រុមហាម៉ាស តាមរយៈអង្គការសប្បុរសធម៌ដែលមានមូលដ្ឋាន នៅប្រទេសអ៊ីតាលី ក្នុងប្រតិបត្តិការដែលសម្របសម្រួលដោយអង្គភាពប្រឆាំងម៉ាហ្វីយ៉ា និងប្រឆាំងភេរវកម្ម។

រដ្ឋអាជ្ញានៅទីក្រុង Genoa ភាគខាងជើងប្រទេសអ៊ីតាលី បាននិយាយនៅក្នុងសេចក្តីថ្លែងការណ៍មួយថា ជនសង្ស័យត្រូវបានចោទប្រកាន់ថា «ជាកម្មសិទ្ធិរបស់ក្រុមប៉ាឡេស្ទីន និងបានផ្តល់ហិរញ្ញប្បទាន» ដល់ក្រុមនេះ ដែលសហភាពអឺរ៉ុបចាត់ទុកថា ជាអង្គការភេរវកម្ម។ 

រដ្ឋអាជ្ញាបាននិយាយថា អ្នកដែលត្រូវបានចាប់ខ្លួន ត្រូវបានចោទប្រកាន់ថា បានបញ្ជូនទៅឲ្យអង្គភាពដែលមានទំនាក់ទំនងជាមួយក្រុមហាម៉ាសនូវទឹកប្រាក់ប្រហែល ៧ លានអឺរ៉ូ (៨,២៤ លានដុល្លារ) ដែលបាន  រៃអង្គាសបានក្នុងរយៈពេលពីរឆ្នាំចុងក្រោយនេះ សម្រាប់គោលបំណងមនុស្សធម៌ជាក់ស្តែង។ នគរបាលបានរឹបអូសទ្រព្យសម្បត្តិ ដែលមានតម្លៃជាង ៨ លានអឺរ៉ូ។

ការស៊ើបអង្កេតបានចាប់ផ្តើម បន្ទាប់ពីប្រតិបត្តិការហិរញ្ញវត្ថុគួរឲ្យសង្ស័យ ត្រូវបានសម្គាល់ និងពង្រីកតាម    រយៈកិច្ចសហប្រតិបត្តិការជាមួយអាជ្ញាធរហូឡង់ និងប្រទេសសហភាពអឺរ៉ុបផ្សេងទៀត ដែលសម្របសម្រួល តាមរយៈទីភ្នាក់ងារយុត្តិធម៌សហភាពអឺរ៉ុប Eurojust។

លោកស្រីនាយករដ្ឋមន្ត្រី Giorgia Meloni បានថ្លែងអំណរគុណដល់អាជ្ញាធរចំពោះ «ប្រតិបត្តិការដ៏          ស្មុកស្មាញ និងសំខាន់ជាពិសេស» ដែលបានលាតត្រដាងការផ្តល់ហិរញ្ញប្បទានដល់ក្រុមហាម៉ាស តាមរយៈ«អ្វីដែលហៅថា អង្គការសប្បុរសធម៌»៕