យន្តហោះយោធាសហរដ្ឋអាមេរិកបន្ថែមទៀត បានទៅដល់កោះព័រតូ រីកូ កាលពីថ្ងៃអាទិត្យ ទី២៨ ខែធ្នូ ក្នុងពេលមានភាពតានតឹងកាន់តែខ្លាំងឡើងរវាងប្រទេសវ៉េណេស៊ុយអេឡា និងសហរដ្ឋអាមេរិក។

យន្តហោះដឹកជញ្ជូន C-130J Super Hercules ត្រូវបានគេឃើញកំពុងហោះឡើង និងហោះចេញពីអាកាសយានដ្ឋាន Rafael Hernandez ក្នុងទីក្រុង Agudallia កោះព័រតូ រីកូ។ យានយន្តយោធាសហរដ្ឋអាមេរិកច្រើនប្រភេទ ក៏ត្រូវបានគេមើលឃើញនៅក្នុងតំបន់ជុំវិញនោះផងដែរកាលពីថ្ងៃអាទិត្យ។

យោធាអាមេរិក បានប្រមូលផ្តុំកម្លាំងយោធាទ្រង់ទ្រាយធំនៅក្នុងតំបន់សមុទ្រការ៉ាអ៊ីបក្នុងរយៈពេលប៉ុន្មានសប្តាហ៍ថ្មីៗនេះ រួមទាំងនាវាផ្ទុកយន្តហោះ យន្តហោះចម្បាំង និងនាវាចម្បាំងផ្សេងៗទៀត។

ប្រធានាធិបតីសហរដ្ឋអាមេរិក លោក ដូណាល់ ត្រាំ បានចោទប្រកាន់ប្រទេសអាមេរិកខាងត្បូងមួយនេះថាបាននាំគ្រឿងញៀនទៅកាន់សហរដ្ឋអាមេរិក ហើយរដ្ឋបាលរបស់លោក រយៈពេលជាច្រើនខែមកនេះបានទម្លាក់គ្រាប់បែកលើទូកដែលមានប្រភពមកពីអាមេរិកខាងត្បូងដែលខ្លួនអះអាងថាកំពុងដឹកគ្រឿងញៀន។ ប្រទេសជាច្រើន បានថ្កោលទោសការវាយប្រហារនេះថាជាការសម្លាប់មនុស្សក្រៅប្រព័ន្ធតុលាការ។