ប្រភពមួយពីគណបក្ស បានប្រាប់សារព័ត៌មាននៅថ្ងៃចន្ទ (ទី២៩ ខែធ្នូ) នេះថា គណបក្សគាំទ្រយោធាដ៏លេចធ្លោរបស់សហភាពមីយ៉ាន់ម៉ា កំពុង «ទទួលបានសំឡេងឆ្នោតយ៉ាងច្រើនបំផុត» នៅក្នុងដំណាក់កាលដំបូងនៃការបោះឆ្នោតដែលគ្រប់គ្រងដំណើរការដោយរបបយោធា។

កងកម្លាំងប្រដាប់អាវុធ បានដណ្តើមកាន់កាប់អំណាច នៅក្នុងរដ្ឋប្រហារឆ្នាំ២០២១ ប៉ុន្តែនៅថ្ងៃទី២៨ ខែធ្នូបានបើកដំណើរការបោះឆ្នោត នៅក្នុងការបោះឆ្នោតជាដំណាក់កាលរយៈពេលមួយខែ ដែលរបបនេះបានសន្យាថា នឹងប្រគល់តួនាទីគ្រប់គ្រងប្រទេសជូនប្រជាជនវិញ។

គណបក្សដ៏មានប្រជាប្រិយ ប៉ុន្តែត្រូវបានរំលាយរបស់មេដឹកនាំប្រជាធិបតេយ្យ លោកស្រី អ៊ុងសាន ស៊ូជី (Aung San Suu Kyi) មិនមានវត្តមាននៅលើសន្លឹកឆ្នោតទេ ហើយលោកស្រីនៅតែជាប់ពន្ធនាគារ ចាប់តាំងពីមានការទម្លាក់ដោយយោធា ជាព្រឹត្តិការណ៍ដែលបង្កឲ្យមានសង្រ្គាមស៊ីវិលរហូតដល់សព្វថ្ងៃ។

អ្នកធ្វើយុទ្ធនាការ អ្នកការទូតលោកខាងលិច និងប្រធានសិទ្ធិមនុស្សរបស់អង្គការសហប្រជាជាតិ បានថ្កោលទោសការបោះឆ្នោត ដោយលើកឡើងពីការបង្រ្កាបយ៉ាងខ្លាំងក្លា លើអ្នកបង្ហាញភាពមិនពេញចិត្ត ហើយបញ្ជីឈ្មោះមានសុទ្ធតែបេក្ខជនដែលជាប់ទាក់ទងជាមួយយោធា។

ហើយបើទោះជាលទ្ធផលផ្លូវការមិនទាន់មានក៏ដោយ ក៏មន្ត្រីគណបក្ស នៅរដ្ឋធានី Naypyidaw ដោយនិយាយក្នុងលក្ខខណ្ឌមិនបញ្ចេញឈ្មោះ បានបង្ហើបឲ្យដឹងថា៖ «គណបក្ស USDP កំពុងឈ្នះអាសនៈភាគច្រើន នៅទូទាំងប្រទេស យោងតាមរបាយការណ៍ផ្សេងៗ»។

គួរបញ្ជាក់ថា លទ្ធផលផ្លូវការមិនទាន់ត្រូវបានប្រកាសដោយគណៈកម្មការរៀបចំការបោះឆ្នោតសហភាពមីយ៉ាន់ម៉ានៅឡើយទេ ហើយមានដំណាក់កាល ២ទៀតដែលគ្រោងនឹងធ្វើឡើងនៅថ្ងៃទី១១ ខែមករា និងថ្ងៃទី២៥ ខែមករា៕