លោក Hans Grundberg បេសកជនពិសេសរបស់អង្គការសហប្រជាជាតិទទួលបន្ទុកកិច្ចការប្រទេសយេម៉ែន កាលពីថ្ងៃសៅរ៍ បានអំពាវនាវដល់គ្រប់ភាគីទាំងអស់ឲ្យអត់ធ្មត់ និងជៀសវាងការកើនឡើងបន្ថែមទៀត ខណៈដែលភាពតានតឹងកើនឡើងនៅក្នុងខេត្ត Hadramout និង Al-Mahrah ភាគខាងកើតរបស់ប្រទេសនេះ ។

នៅក្នុងសេចក្តីថ្លែងការណ៍មួយដែលបានបង្ហោះនៅលើវេទិកាប្រព័ន្ធផ្សព្វផ្សាយសង្គម X លោក Grundberg បានបញ្ជាក់ជាថ្មីនូវការអំពាវនាវរបស់អគ្គលេខាធិការអង្គការសហប្រជាជាតិឲ្យមានការអត់ធ្មត់ ការបន្ធូរបន្ថយភាពតានតឹង និងការសន្ទនា» ដោយជំរុញឲ្យគ្រប់ភាគីទាំងអស់ជៀសវាងសកម្មភាពដែលអាចធ្វើឲ្យស្ថានការណ៍កាន់តែស្មុកស្មាញឡើង។

លោកបានគូសបញ្ជាក់ពីសារៈសំខាន់នៃកិច្ចខិតខំប្រឹងប្រែងសម្របសម្រួលក្នុងតំបន់ជាបន្តបន្ទាប់ ដោយកត់សម្គាល់ថា លោកនៅតែចូលរួមជាមួយភាគីពាក់ព័ន្ធយេម៉ែន និងអ្នកពាក់ព័ន្ធក្នុងតំបន់ ក្នុងការគាំទ្រដល់ការបន្ធូរបន្ថយភាពតានតឹង និងវឌ្ឍនភាពឆ្ពោះទៅរក «ដំណោះស្រាយនយោបាយដ៏ទូលំទូលាយ និងពេញលេញ» ចំពោះជម្លោះ នៅក្នុងប្រទេសយេម៉ែន។

លោក Grundberg បានធ្វើការអត្ថាធិប្បាយនេះ បន្ទាប់ពីប្រទេសអារ៉ាប៊ីសាអ៊ូឌីត បានធ្វើការវាយប្រហារតាមអាកាស កាលពីថ្ងៃសុក្រ ដោយកំណត់គោលដៅទីតាំងក្រុមប្រឹក្សាអន្តរកាលភាគខាងត្បូង (STC) រួមទាំងទីតាំងរបស់កងកម្លាំង Hadrami Elite នៅក្នុងតំបន់ Ghayl bin Yamin ជិតតំបន់ប្រេងសំខាន់ៗ។ ពុំមានរបាយការណ៍អំពីអ្នកស្លាប់ ឬការខូចខាតដល់គ្រឿងយុទ្ធោបករណ៍ទេ៕