វិមានក្រឹមឡាំង នៅថ្ងៃចន្ទ (ទី២៩ ខែធ្នូ) នេះ បានលើកឡើងថា អ៊ុយក្រែនគួរតែដកកងទ័ពរបស់ខ្លួនចេញពីផ្នែកនៃតំបន់ Donbas ដែលខ្លួននៅតែគ្រប់គ្រង ប្រសិនបើប្រទេសនេះចង់បានសន្តិភាព ហើយថា ប្រសិនបើទីក្រុងគីវមិនធ្វើកិច្ចព្រមព្រៀងទេនោះ ខ្លួននឹងកាន់តែបាត់បង់ដែនដីបន្ថែមទៀត។

ប្រធានាធិបតីនៃប្រទេសរុស្ស៊ី និងសហរដ្ឋ លោក Vladimir Putin និងលោក Donald Trump បានជជែកគ្នា កាលពីថ្ងៃអាទិត្យ នៅមុនកិច្ចប្រជុំរបស់មេដឹកនាំអាមេរិក នៅទីក្រុង Miami ជាមួយប្រធានាធិបតីអ៊ុយក្រែន លោក Volodymyr Zelenskiy។ ហើយអ្នកនាំពាក្យវិមានក្រឹមឡាំង លោក Dmitry Peskov បានបញ្ជាក់នៅថ្ងៃចន្ទនេះថា ការសន្ទនាតាមទូរសព្ទមួយផ្សេងទៀត ត្រូវបានគ្រោងទុកក្នុងពេលឆាប់ៗនេះ។

លោក Peskov បានបដិសេធមិនធ្វើអត្ថាធិប្បាយ ជុំវិញគំនិតបង្កើតតំបន់សេដ្ឋកិច្ចសេរី នៅតំបន់ Donbas ឬអំពីអនាគតនៃរោងចក្រថាមពលនុយក្លេអ៊ែរ Zaporizhzhia ដែលត្រូវបានគ្រប់គ្រងដោយរុស្ស៊ី ដោយគ្រាន់តែបានប្រាប់ថា វិមានក្រឹមឡាំងយល់ថា ជារឿងមិនសមរម្យ។

នៅពេលត្រូវបានសួរអំពីការកត់សម្គាល់របស់ជំនួយការវិមានក្រឹមឡាំង លោក Yuri Ushakov អំពីការសម្រេចដែលទីក្រុង Kyiv ត្រូវចាំបាច់ដោះស្រាយបញ្ហាតំបន់ Donbas លោក Peskov បានឆ្លើយថា អ៊ុយក្រែនគួរតែដកកងទ័ពរបស់ខ្លួនចេញពីផ្នែកដែលពួកគេនៅតែគ្រប់គ្រង។

បើយោងតាមការប៉ាន់ប្រមាណរបស់រុស្ស៊ី បានបង្ហាញថា បច្ចុប្បន្ន រុស្ស៊ីគ្រប់គ្រង ១ភាគ៥ នៃដែនដីរបស់អ៊ុយក្រែន ក្នុងនោះរួមទាំងតំបន់គ្រីម៉ាដែលខ្លួនបានបញ្ចូលជាដែនដីឧបសម្ព័ន្ធក្នុងឆ្នាំ២០១៤ ប្រហែល ៩០ភាគរយនៃតំបន់ Donbas ៧៥ភាគរយនៃតំបន់ Zaporizhzhia និង Kherson ហើយនិងកាន់កាប់តិចតួចលើតំបន់ Kharkiv, Sumy, Mykolaiv និង Dnipropetrovsk៕