នគរបាលអូស្រ្តាលី បាននិយាយនៅថ្ងៃអង្គារ (៣០ ធ្នូ) នេះថា ការស៊ើបអង្កេតមួយ ដែលបានពង្រីកដល់ប្រទេសហ្វីលីពីន លើបុរសខ្មាន់កាំភ្លើងជាឪពុកនិងកូន ២នាក់ ដែលត្រូវចោទប្រកាន់ពីបទបាញ់សម្លាប់មនុស្ស ១៥នាក់ ក្នុងពិធីបុណ្យជនជាតិជ្វីហ្វ នៅឆ្នេរទីក្រុងស៊ីដនី មិនបានរកឃើញភស្តុតាងណាមួយដែលបង្ហាញថា ពួកគេជាផ្នែកមួយនៃ «បណ្ដាញភេរវករដ៏ទូលំទូលាយ» នោះទេ។

លោកស្រី Krissy Barrett ស្នងការនគរបាលសហព័ន្ធអូស្ត្រាលី បាននិយាយថា ខ្មាន់កាំភ្លើងជាឪពុក ឈ្មោះ Sajid Akram អាយុ ៥០ឆ្នាំ ជាអ្នករស់នៅទីក្រុងស៊ីដនី និងកូនប្រុសខ្លួនឈ្មោះ Naveed Akram អាយុ ២៤ឆ្នាំ បានចំណាយពេលភាគច្រើននៃខែវិច្ឆិកា ក្នុងទីក្រុង Davao ភាគខាងត្បូងហ្វីលីពីន។

លោកស្រីបន្តថា បុគ្គលទាំងពីរនេះ ត្រឡប់ទៅអូស្រ្តាលីវិញ តាមជើងហោះហើរពីទីក្រុងម៉ានីល នៅថ្ងៃទី២៩ ខែវិច្ឆិកា។ ពីរសប្តាហ៍ក្រោយមក ពួកគេត្រូវបានចោទប្រកាន់ពីបទបាញ់សម្លាប់មនុស្ស ១៥នាក់ និងធ្វើឱ្យមនុស្ស ៤០នាក់ផ្សេងទៀត រងរបួស ក្នុងការបាញ់ប្រហារដ៏ធំមួយ ដាក់គោលដៅលើពិធីបុណ្យ Hannukah នៅឆ្នេរ Bondi ទីក្រុងស៊ីដនី។

លោកស្រី Barrett បន្តថា នគរបាលជាតិហ្វីលីពីន បានឱ្យដឹងថា អ្នកទាំងពីរកម្រចាកចេញពីសណ្ឋាគារណាស់ អំឡុងដំណើរពួកគេនៅទីនោះ។ ស្នងការអូស្ត្រាលីរូបនេះប្រាប់អ្នកយកព័ត៌មានថា “ពុំមានភស្តុតាងណាមួយបង្ហាញថា ពួកគេបានទទួលការបណ្តុះបណ្តាល ឬឆ្លងកាត់ការរៀបចំផ្នែកភស្តុភារទេ”។

លោកស្រីសង្កត់ធ្ងន់ថា បុគ្គលទាំងនេះត្រូវចោទប្រកាន់ថា បានធ្វើសកម្មភាពដោយខ្លួនឯងប៉ុណ្ណោះ ហើយពុំមានភស្តុតាងណាមួយដែលបង្ហាញថា ជនល្មើសទាំងនេះគឺជាផ្នែកមួយនៃក្រុមភេរវករដ៏ធំទូលាយ ឬត្រូវបានអ្នកដទៃណែនាំឱ្យធ្វើការវាយប្រហារឡើយ។ លោកស្រីបញ្ជាក់ថា ទោះយ៉ាងនេះក្ដី ការរកឃើញនេះក៏មិនមែនមានន័យថា ពួកគេនៅហ្វីលីពីន សម្រាប់ទេសចរណ៍នោះដែរ៕