ក្រុមអ្នកវិទ្យាសាស្ត្រអឺរ៉ុប បាននិយាយក្នុងរបាយការណ៍មួយ ចេញផ្សាយនៅថ្ងៃអង្គារ (៣០ ធ្នូ) នេះថា បម្រែបម្រួលអាកាសធាតុ ដែលកាន់តែអាក្រក់ទៅៗដោយសារឥរិយាបថមនុស្ស បានធ្វើឱ្យឆ្នាំ២០២៥នេះ ក្លាយជាឆ្នាំមួយក្នុងចំណោមឆ្នាំមានអាកាសធាតុក្តៅបំផុតចំនួន៣ ក្នុងកំណត់ត្រាពិភពលោក។

ទិន្នន័យបច្ចុប្បន្នបង្ហាញថា ឆ្នាំ២០២៤ ជាឆ្នាំក្ដៅបំផុតទី១ និងតាមពីក្រោយដោយឆ្នាំ២០២៣ ខណៈអ្នកវិទ្យាសាស្រ្តធ្លាប់ព្យាកររួចមកហើយថា ឆ្នាំ២០២៥ ក៏នឹងស្ថិតក្នុងកំណត់ត្រាផងដែរ។ នេះជាលើកដំបូងហើយ ដែលសីតុណ្ហភាពជាមធ្យមរយៈពេល ៣ឆ្នាំ បានបំបែកកម្រិតកំណត់ ក្នុងកិច្ចព្រមព្រៀងទីក្រុងប៉ារីស ឆ្នាំ២០១៥ ដែលដាក់ដែនកំណត់ការឡើងកម្ដៅផែនដីមិនឱ្យលើស ១,៥អង្សាសេ ចាប់តាំងពីសម័យមុនឧស្សាហកម្ម។ អ្នកជំនាញនិយាយថា ការរក្សាសីតុណ្ហភាពភពផែនដីឱ្យនៅក្រោមដែនកំណត់នោះ អាចជួយសង្គ្រោះជីវិត និងរារាំងការបំផ្លិចបំផ្លាញបរិស្ថានធ្ងន់ធ្ងរជុំវិញពិភពលោក។

របាយការណ៍វិភាគពីក្រុមអ្នកស្រាវជ្រាវមកពីស្ថាប័ន ចំណាត់ថ្នាក់អាកាសធាតុពិភពលោក (WWA) មួយនេះ បានកើតឡើងបន្ទាប់ពីរយៈពេលពេញមួយឆ្នាំ ដែលសកម្មភាពដ៏គ្រោះថ្នាក់របស់មនុស្សនៅជុំវិញពិភពលោក ប៉ះពាល់ភពផែនដី ដែលកំពុងឡើងកម្ដៅខ្លាំងទៅៗ។

ក្រុមអ្នកស្រាវជ្រាវ បានលើកឡើងពីការបន្តដុតឥន្ធនៈហ្វូស៊ីល - មានដូចជា ប្រេង ឧស្ម័ន និងធ្យូងថ្ម - ដែលបានបញ្ជូនឧស្ម័នផ្ទះកញ្ចក់ចូលទៅក្នុងបរិយាកាស ដោយធ្វើឱ្យភពផែនបន្តដីឡើងកម្ដៅឥតឈប់ឈរ។ អ្នកវិទ្យាសាស្រ្តបានព្រមានថា ព្រឹត្តិការណ៍អាកាសធាតុធ្ងន់ធ្ងរបានសម្លាប់មនុស្សរាប់ពាន់នាក់ និងធ្វើឱ្យខូចខាតសេដ្ឋកិច្ចរាប់ពាន់លានដុល្លារជារៀងរាល់ឆ្នាំ៕